Kryetari i Partisë Demokratike, Lulzim Basha, tha sot se PD ka ngritur një grup pune të nivelit të lartë përmes të cilit të përmblidhen të gjitha propozimet nga të gjitha kahjet e PD për të shkuar tek një vendim i përbashkët. Duke folur në opinion ai reagoi në lidhje me akuzat që bëhen ndaj tij prej disa kohësh dhe që lidhenh me apatinë e pretenduar prej tyre që reflekton kryetari i PD.
Sipas Bashës sulmet ndaj tij dhe PD nuk janë ide politike dhe se kundërshtarët apo kritikët e tij janë pjesë e PD-së, do të vazhdojnë të jenë pjesë deri në momentin kur të deklarojnë vetë se s’duan të jenë.
“E kam thënë që PD duhet të aplikojë standardet evropiane, duhet të respektojë kontributet e çdo anëtari të kësaj partie”, tha Basha.
Në vijim Basha tha se zgjedhja e kandidatëve për deputetë dhe kryetarë të bashkive do të bëhet nga anëtarësia e PD-së.
“Arben Imami tha se nuk do të marrë pjesë në Grupin e Punës, unë mendoj se kjo nuk i shërben çështjes. Po pse unë do të bëj bisedime me secilin prej tyre? Jo, unë i krijoj kushtet dhe secili të japë kontributin nëse dëshiron”, tha Basha.
Sipas Bashës, demokratët sot kanë një mundësi të artë për transformimin e kësaj partie dhe më pas të Shqipërisë.
“Ftesa ime është që ata kontributet që kanë në PD të vazhdojnë t’i kenë në këtë parti. Unë jam konsultuar me z. Berisha dhe me shumë demokratë, para se të merrnim sot në kryesinë e PD një vendim unanim për ngritjen e një grupi pune të një niveli të lartë politik”, tha Basha.
