Policia e Vlorës ka reaguar sot zyrtarisht për ngjarjen e mbrëmshme, në këtë qytet, ku nga shkëmbimi i zjarrit, mbetën të plagosur tre persona. Sipas reagimit të sotëm të Policisë, mësohet se janë prangosur vetëm tre personat e plagosur, ndërsa janë shpallur në kërkim dy të tjerët.
Sipas Policisë së Vlorës, mësohet se në vijim të veprimeve hetimore për dokumentimin e ngjarjes së ndodhur ditën e djeshme në lagjen “28 Nëntori”, pranë Kishës Ortodokse, ku si pasojë e të shtënave me armë zjarri mbetën të plagosur tre persona, nga tërësia e hetimeve të kryera prej Grupit Hetimor të DVP., Vlorë në bashkëpunim me Prokurorinë e Vlorës, ka rezultuar se dy grupe personash të cilët lëviznin me 2 automjete pasi janë konfliktuar me njëri-tjetrin për motive të cilat nuk bëhen të ditura për arsye hetimore, kanë qëlluar mbi njëri tjetrin me armë zjarri.
Në përfundim të veprimeve hetimore paraprake, Policia ka bërë arrestimin e…
- G. C., 27 vjeç, banues në Vlorë,
- T. B., 27 vjeç, banues në Vlorë,
- E. Ll., 27 vjeç, banues në Vlorë,
Si edhe ka shpallur në kërkim…
- E. M.
- P. A.
Si rezultat i hetimeve dhe këqyrjes së kamerave ka rezultuar se G. C., së bashku me shtetasit E. M., dhe P. A., kanë shtënë me armë zjarri drejtim shtetasve T. B., dhe E. Ll., të cilët më pas janë kundërpërgjigjur.
Policia ka sekuestruar në vendngjarje një armë zjarri tip pistoletë, 10 gëzhoja dhe 2 automjete.
Vijojnë hetimet në bashkëpunim me Prokurorinë Vlorë për zbardhjen e plotë të rrethanave të kësaj ngjarje.
Materialet hetimore do t’i kalojnë Prokurorisë Vlorë, për veprat penale ”Vrasje me dashje e mbetur në tentativë” dhe “Prodhimi dhe mbajta pa leje e armëve luftarake dhe e municionit”, të parashikuar nga nenet 76 e 22 dhe 278 të Kodit Penal.
