Kryeministri Edi Rama “e ka ndarë mendjen”, që për çdo ditë të bëjë ndonjë deklaratë sa për “të prodhuar lajm”, në funksion të zhvendosjes së vëmendjes nga problemet e shumta brenda vendit, ku më të rëndësishmet mbeten krim, droga dhe paaftësia e qeverisë për të plotësuar kushtet për hapjen e negociatave me BE-në. Ndërsa dje nga Prishtina, çuditi me idenë “dy shtete një president”, sot ka tentuar të bëjë ziliqarë italianët.
“Jetesa në Shqipëri e njëjtë si në Itali, por këtu taksat janë më të ulëta”, ka guxuar kryeministri Edi Rama sot, “të joshë”, italianët. Këtë e bën në një kohë kur ka dështuar në tentativën për të “joshur” shqiptarët, për të mos i lënë të braktisin vendin, sikurse po ndodh me fluksin e viteve të fundit.
Deklaratën “joshëse” kryeministri Edi Rama e bëri gjatë fjalës së tij në forumin e biznesit Shqipëri – Itali, ku ai tha se Shqipëria ka potenciale dhe mundësi të mëdha për të investuar. Sipas kryeministrit jetesa në Shqipëri është e njëjtë me atë në Itali, por me ndryshimin se sipas tij në Shqipëri taksat janë më të ulëta.
“Italianët këtu e ndjejnë veten si në shtëpinë e tyre. Ka një mënyrë të jetuari në Shqipëri që ngjajnë si dy pika uji me jetesën në Itali, por me ndryshimin se këtu taksat janë më të ulëta. Por nëse do flisja për taksat këtu nuk do më mbështeste ministri. Vendi ynë ka shumë potenciale dhe mundësi për të investimet.
Shqipëria është një vend që por rritet nga ana ekonomike. Vendi ka shumë potenciale, në energji, naftë, minerale, bujqësi, por edhe sektorin agro-ushqimor. Ju ftoj të investoni edhe në turizëm. Kemi përgatitur edhe një legjislacion shumë tërheqës për turizmin. Në vendin tonë kanë ardhur 200 sipërmarrje italiane në kuadër të forumit të biznesit Itali-Shqipëri. Ta bëjmë Shqipërinë një Itali të vogël”, tha kryeministri. DRONI.al
