Kryeministri shqiptar Edi Rama dhe homologu i tij grek Aleksis Tsipras kanë zhvilluar sot takimin e tyre në kuadër të forumit ekonomik ndërkombëtar në Davos të Zvicrës. Kryeministri grek publikoi në rrjetin e tij social Twitter një foto nga takimi, ku dy shefat e qeverive kanë në krah Ministrat e Jashtëm, Bushati e Kotzias.
Sipas mediave greke, që citojnë burime pranë kryeministrit, Rama e Tsipras do të shqyrtojnë rezultatet e takimit që dy shefat e diplomacive zhvilluan në Korçë javën e kaluar.
Negociatat synojnë një hartë rrugore për zgjidhjen e problemeve dypalëshe.
Mediat greke gjithashtu vënë në dukje se zgjidhja e këtyre problemeve synohet të arrihet brenda pranverës, me qëllim që të hapet rruga për çeljen e negociatave për anëtarësim të Shqipërisë në Bashkimin Europian.
Postimi i kryeministrit Edi Rama
Davos – Me Kryeministrin e Greqisë, Alexis Tsipras, për progresin e bërë deri më tani përmes dialogut dypalësh; në adresimin e çështjeve të bartura të së shkuarës, në funksion të çeljes së një kapitulli të ri partneriteti strategjik për të ardhmen.
Objektivi i përbashkët finalizimi i dialogut dhe nënshkrimi në pranverë i Dokumentit të Partneritetit Strategjik në Tiranë.
https://www.facebook.com/edirama.al/videos/10155505108811523/
