Katër punonjës të Policisë Kufitare në Trebisht dhe Bllatë të Dibrës janë arrestuar sot nga Shërbimi për Çështjet e Brendshme dhe Ankesat (SHÇBA). Ata kalonin mallra pa doganë të disa bizneseve dhe ishin në hetim prej 3 muajsh.
Sipas burimeve zyrtare, mësohet se SHÇBA e finalizoi sot operacionin “Trebishti” duke i arrestuar për veprat penale “Korrupsion pasiv, të personave që ushtrojnë funksione publike”, “Shpërdorim detyre” dhe “Kontrabandë me mallra të tjerë”.
Ata janë…
Sulejman Xheleshi, Përgjegjës i PKK Trebisht;
Shehat Kazani, me detyrë trup shërbimi në PPK Bllatë;
Sulejman Islami, me detyrë trup shërbimi në PPK Bllatë
Vinar Seitaj, trup shërbimi në Kom e Policisë Burrel, më herët trup shërbimi në PKK Trebisht.
Hetimi nga strukturat e SHÇBA, nisur mbi bazën e informacioneve të siguruara, zgjatën rreth 3 muaj dhe u ndoqën me metoda speciale. 4 punonjësit e Policisë Kufitare, në bashkëpunim me njëri-tjetrin, dyshohet se kanë favorizuar disa biznese dhe shtetas për të shmangur detyrimet doganore, në këmbim të shumave që shkonin deri në 100 mijë lekë.
