Policia e Tiranës arrestoi dje një avokat 35- vjeçar, i cili akuzohet për mashtrim me shuma të mëdha, fshehje të të ardhurave dhe falsifikim dokumentesh. Burime nga Policia thanë se Gazmir Xhurxhi u arrestua nga oficerët e Antikrimit Ekonomik gjatë operacionit të koduar “Avokati”.
Xhurxhi ishte denoncuar para disa ditësh nga klienti i tij, shtetasi me iniciale H. D., 59 vjeç, nga Klosi. Ky kishte fituar një dëmshpërblim për një padi civile, por nuk kishte arritur ta merrte të gjithë shumën e parave, pasi një pjesë i ishte përvetësuar nga përfaqësuesi i tij ligjor. Burimet thanë se avokati Xhurxhi, nëpërmjet falsifikimit të dokumenteve, kishte arritur të përvetësonte një pjesë të shumës së parave që i takonte klientit të tij. Bëhet fjalë për 1.7 milionë lekë (të reja), të cilat avokati ia kishte marrë klientit të tij nëpërmjet mashtrimit. Hetimet e kryera nga oficerët e Antikrimit Ekonomik të Tiranës, në bashkëpunim me Prokurorinë, zbuluan mashtrimin e kryer nga avokati Gazmir Xhurxhi, i cili u arrestua pasditen e djeshme.
“Arrestimi i shtetasit të sipërpërmendur u bë për veprën penale ‘Mashtrim në shuma të mëdha’, ‘Fshehje të të ardhurave’ dhe ‘Falsifikim i dokumenteve’ parashikuar nga nenet 143/2, 180 dhe 186 i Koditv Penal”, pasi shtetasi Gazmir Xhurxhi, me profesion avokat, i ka marrë nëpërmjet mashtrimit 1.7 milionë lekë të rinj, duke falsifikuar disa fatura dhe dokumente shtetasit H. D., 59 vjeç, banues në Klos”, tha dje zyrtarisht Policia e Tiranës.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
