Ish-kreu i prokurorisë së Elbasanit, Dritan Gina mësohet se do të depozitojë kallëzim penal për kryeprokuroren Arta Marku. Kallëzimi penal pritet që të depozitohet sot nga Gina për shkarkimin e tij nga detyra. Një ditë më parë ai refuzoi vendimin e Markut, pasi sipas tij është antiligjor. Dritan Gina e akuzon Arta Markun për shpërdorim detyre.
Ndërkohë Prokurori i ri i komanduar Ardian Nezha ka marrë zyrtarisht detyrën pranë Prokurorisë së Rrethit gjyqësor Elbasan. Ai është paraqitur në Prokurori rreth orës 8:00 të mëngjesit. Në fillim u raportua se paraardhësi Dritan Gina nuk e ka lëshuar zyrën, por burimet tashmë konfirmojnë se gjithçka është mbyllur dhe Gina ka bërë dorëzimet.
Nezha u emërua ditën e djeshme nga kryeprokurorja Arta Marku e cila shkarkoi më parë Dritan Ginën dhe se ky i fundit nuk pranoi shkarkimin pasi sipas tij është antiligjor. Një ditë më parë ai deklaroi se “refuzoj të zbatoj vendimin e kryeprokurores së përkohshme. Unë nuk jam i komanduar. Jam i caktuar i përkohshëm dhe prokurori i përkohshëm nuk ka tagër ligjor për të më liruar nga detyra. Vendimmarrja i takon Këshillit të lartë të Prokurorisë”.
