23 vjeçari nga Shkodra, Florenc Beqiri, ndërroi jetë mbrëmë në një spital në Marsejë të Francës, pasi mjekët i shkëputën aparaturat që e mbanin ende gjallë. Por pavarësisht humbjes së të birit, familja e tij duket se nuk dorëzohet dhe do t’i shkojë deri në fund çështjes. Gëzim Beqiri, babai i Florencit ka vendosur të bëjë ç’është e mundur për të zbardhur të vërtetën për djalin e tij.
I kontaktuar nga Report Tv ai ka rikonfirmuar edhe njëherë se mjekët francezë i kanë fikur aparaturat pa lejen e tij dhe familjarëve të tjerë. Gëzimi shtoi se po e ndihmon një avokat në këtë betejë, ndërsa evidentoi se janë disa të rinj emigrantë shqiptarë që po e ndihmojnë në Francë në këto ditë të vështira. “Kam marrë avokat dhe do t’i shkoj deri në fund kësaj çështje, mjekët i kanë fikur aparaturat pa lejen time. Në këto ditë të vështira janë disa djem shqiptarë në Francë që po më ndihmojnë në çdo drejtim”, u shpreh Beqiraj.
