Byroja e Kuvendit u mblodh sot për të vendosur mbi kërkesën e Grupit të PS për përjashtimin e disa deputetëve të opozitës për 10 ditë nga punimet e Parlamentit. Pavarësisht se shumica e rrëzoi kërkesën e opozitës për zhvillimin me praninë e mediave të kësaj mbledhje, nga aty kanë dalë disa video që tregojnë sesi u mbrojtën deputetët. Ata kanë mbrojtur veten duke iu referuar betimit të tyre si deputet, sipas Kushtetutës.
Në videon e “BW” shihet fjala e kryetares së LSI-së Monika Kryemadhi, deputetit të LSI Endrit Brahimllari dhe deputetit të PD, Ervin Salianji. Ndërkaq deputeti i PS-së Alket Hyseni akuzoi kryetaren e LSI se po fyen Byronë. “Zonja Kryemadhi edhe këtu po fyen Byronë, sekretari i Grupit të LSI po filmon fshehurazi mbledhjen”, tha Hyseni. Ndërsa deputeti i PD-së Ervin Salianji tha: “Shokë të byrosë, ne nuk kemi dëmtuar askënd, tymueset kanë qenë reagim simbolik njësoj sikur të mbaja në dorë një degë kanabisi për të treguar simbolin e shtetit tuaj. Tymi simbolik tregonte që ju po i vini flakën shtetit!”
