Një situatë alarmante mund të konsiderohen 24 orët e fundit. Një situatë e tillë, provokohet nga 5 raste tentative dhënie fund jetës, nëprmjet vetëhelmimit, apo vetëvrasjes, duke tentuar prerjen e damarëve.
Vetëhelmimet, 3 raste
Tre tentativa flijimi, në të njëjtën mënyrë kanë zgjedhur që t’i japin fund jetës në të njëjtën mënyrë, duke pirë helm.
Janë tre raste të ndryshme, ku njëra prej vajzave, është në moshë fare të mitur.
Në Kavajë, rreth orës 22:00, në banesë, në kushte depresioni është vetëhelmuar me medikamente 12-vjeçarja K. P.
Vogëlushja u gjet në gjendje të rëndë nga familjarët të cilët e dërguan me urgjencë në spital. Fatmirësisht nga ndihma e dhënë nga bluzat e bardha, e mitura ndodhet në spital jashtë rrezikut për jetën.
Rasti i dytë ka ndodhur pasditen e djeshme në Shijak. Rreth orës 15:00 të së martës, në fshatin Koxhas, në banesë është vetëhelmuar me insekticide 30-vjeçarja L. C., e cila ndodhet në spital nën kujdesin e mjekëve.
Nuk dihen ende shkaqet që e kanë shtyrë të renë drejt këtij akti, ndërkohë që policia ka nisur hetimet.
Tentativa e tretë e flijimit ka ndodhur paraditen e së martës, në qytetin e Laçit.
Rreth orës 10.00, në lagjen nr. 2, Laç, është vetëhelmuar me bar miu, 22-vjeçarja M. K., banuese Kurbin, e cila ndodhet në spital jashtë rrezikut për jetën.
Dyshohet se akti i rëndë është kryer në kushtet e tronditjes psikologjike, ndërkohë që materialet iu referuan Prokurorisë së Lezhës për vlerësim.
Vetëvrasjet, 2 raste
Dy persona kanë tentuar që t’i japin fund jetës në Tiranë duke prerë damarët e dorës.
Bëhet fjalë për dy raste të ndryshme të cilët janë shënuar mbrëmjen e së martës.
Një djalë i ri vetëm, 20 vjeç në gjendje të rëndë psikologjike ka prerë damarët e dorës, pasi i ati nuk e linte të hynte në banesë dhe të takonte të ëmën.
Sipas Policisë, I. M., 40 vjeç, banues në Bathore, rreth orës 19:00 të mbrëmjes së djeshme, në banesë, duke mos e lejuar të takojë nënën e tij dhe të qëndrojë në banesë, ka shtyrë në vetëvrasje, duke prerë damarët nga mërzia të birin F. M., 20 vjeç, banues në Bathore.
Sipas pretendimeve të 40-vjeçarit, i cili u arrestua nga policia, i biri ishte natyrë problematike dhe për këtë arsye kishte vendosur që ti jepte mësim.
Fatmirësisht pas mjekimit të marrë në Spitalin e Traumës, i riu ndodhet jashtë rrezikut për jetën dhe është larguar për në banesë.
Rasti i dytë ka ndodhur po mbrëmjen e djeshme, ku një burrë ka prerë damarët e dorës.
Policia sqaron se rreth orës 19:30, në spitalin “Nënë Tereza”, ka shkuar i shoqëruar nga familjarët, në gjendje të rëndë shëndetësore V. Sh., vjeç 52, banues në Babrru. Nga veprimet hetimore të kryera rezultoi se 52-vjeçari kishte prerë damarët në banesën e tij, pasi vuan nga probleme mendore.
Lidhur me të dyja rastet materialet iu referuan Prokurorisë së Tiranës, për vlerësim.
