VIDEO/ 27-Vjetori i ‘Lëvizjes Studentore’, Berisha apel të rinjve nga Qyteti Studenti: Keni 1001 arsye për të rrëzuar narko-qeverinë e Ramës

Në fjalën e tij në aktivitetin e FRPD në Qytetin Studenti, ish-kryeministri Berisha është shprehur se është nder dhe privilegj i madh të kremtojmë se bashku me studentët ditën e rinisë shqiptare. Sipas tij ajo që quhet lëvizje studentore e dhjetorit është dita e revolucionit demokratik paqësor më madhështor e më të rëndësishëm në historinë e Shqipërisë.

“Historia është një e shkuar edhe të merresh shumë me të edhe nuk duhet, por sa herë kujton këtë ditë frymëzohesh, frymëzohesh dhe vetëm frymëzohesh. Si sot 27 vite më parë bashkëmoshatarët tuaj u ngritën mbi frikën, dhunën, terrorin dhe u përballën në këtë qytet të bekuar, në rrugët e Tiranës, me diktaturën më staliniste të dhunshme e barbare. Të parin çliruan qytetin e tyre dhe e kthyen këtë qytet në simbolin e lirisë së shqiptarëve. Në Shqipërinë e viteve 90’ ishin ekzekutuar me regjistër 60 bashkëmoshtarë të tuaj. Akoma më makabre, trupat e disa prej tyre zvarriteshin ditën për diell në Korçë, Gjirokastër, Sarandë e Shkodër vetëm për të mbjellë terror e kudo”, tha Berisha.

Ish-kryeministri duke theksuar se qeveria aktuale ka ndërtuar narko-shtetin, falë lidhjeve të kryeministrit Rama me trafikun e drogës, i bëri apel studentëve të pranishëm në sallë që të shfrytëzojnë forcën e jashtëzakonshme shpirtërore për të rrëzuar qeverinë.

“Zgjidhja sot është vetëm guximi dhe trimëria juaj. Ju keni 1001 arsye që të ngriheni më shumë dhe ju grantoj ju se vetëm kjo sallë do të mjaftonte për ta hedhur tutje këtë qeveri. Historia e Shqipërisë duhet të jetë historia e përmbysjes së narko-shtetit, e përmbysjes së Edi Ramës dhe klikës së tij”, nënvizoi Berisha.

/DRONI.al/