FOTO & EMRA/ Vrau prostitutën shqiptare në 1998, serialkillerit italian i shtohen edhe 30 vite burg

Edhe 30 vjet burg për 59-vjeçarin nga Genova Maurizio Minghella, vrasësi serial i dënuar ndërkohë me disa burgime të përjetshme për vrasjen e shtatë prostitutave. Vendimi është marrë sot në mesditë nga një gjykatë e Torinos, e cila pranoi kërkesën e prokurorit Roberto Sparagna.
Në këtë proces, Minghella akuzohej për vrasjen e një të reje shqiptare, Floreta Islami, vrarë ditën e Shën Valentinit më 1998, pranë Rivolit. Një vrasje si shumë të tjera në zonën e Torinos në periudhën 1996-1998, disa prej tyre të kryera pikërisht nga Minghella. Vrasësi në atë kohë ishte i dënuar për vrasjet e katër prostitutave në Genova në fund të viteve ’70, por në periudhën e krimit ishte në regjim gjysmëlirie, domethënë me mundësinë për të dalë nga burgu gjatë ditës për të shkuar në punë.
Kuestura e Torinos ka hapur më 2015 disa çështje të pambyllura të asaj periudhe, nën dritën e fakteve të reja. Një nga këto ka të bëjë me shallin e leshtë me ngjyrë të kuqe të përdorur për të mbytur Islamin, 20 vjeç në kohën e vdekjes. Thuajse 20 vjet më pas, teknologjitë e reja biomolekulare të përdorura nga policia shkencore kanë mundësuar evidentimin e DNA-së së Minghellës mes fijeve të shallit.
Një tjetër tregues është fakti që në atë periudhë vrasësi në gjysmëliri ishte vënë re në atë zonë të periferisë teksa vëzhgonte prostitutat. Për këtë arsye, më 8 mars 2016, gjyqtari Cristiano Trevisan firmosi një mandat arresti të ri për Minghellën që gjendej ndërkohë në burg i dënuar me burgim të përjetshëm për vrasjen e tri prostitutave (kryer në fund të viteve ’90), dënim i konfirmuar edhe nga Kasacioni më 2005, por që i mungonin edhe pak muaj për të përfituar një regjim burgu më të lehtë.
Minghella nuk u paraqit kurrë në gjyq personalisht.
“Dua të harrohem”, bëri të ditur përmes avokatit mbrojtës, por edhe duke mos pranuar akuzat. Por askush nuk mund ta harrojë, as policia dhe as prokuroria.
“Do të ishte ngushëlluese të arrije në konkluzionin se bëhet fjalë për një njeri të paaftë të kuptojë vlerën e veprimeve të tij, viktimë e instinkteve kompulsivë e të pafrenueshëm”, tha prokurori Sparagna.
“Por nuk është një i sëmurë mendërisht, është një person normal që di të zgjedhë mes të mirës e të keqes”.
Ndërkaq, një skuadër e policisë vazhdon të hetojë për pesë raste të tjerë të ngjashëm, vrasjet e pesë prositutave që kanë mbetur pa autor. Hipoteza është që vrasjet janë kryer nga Minghella.

/DRONI.al/