Pamje nga nje stervitje e trupave te NATO
Ish-shefi i Shtabit të Përgjithshëm të FA-ve, gjeneral Jeronim Bazo tregoi sot disa të dhëna që nuk diheshin në lidhje me katër ushtarët që braktisën ushtrinë dhe qëndruan në Britani.
Në emisionin “Kjo Javë” të gazetares Nisida Tufa, në Neës24, Bazo tha se ushtarakët kanë mbyllur me sukses stërvitjen, ndryshe nga ekipi tjetër në vitin 2013 që dështoi por nuk janë grumbulluar më.
“Bëhet fjalë për një stërvitje që ka dhe formën e kompeticionit që zhvillohet në Uellsin Qendror në Mbretërinë e Bashkuar dhe stërvitja quhet “Patrullimi në lartësitë e Cambrias” (Cambrian Patrol). Është një ushtrim dhe stërvitje e mirënjohur në të gjithë botën tashmë, që prej më se 50 vjetësh. Me kalimin e viteve ka filluar të jetë e hapur edhe për pjesëmarrës ndërkombëtarë. Pra është një test, është një provë për të parë se sa mirë i zbaton në terren aftësitë e fituara gjatë stërvitjes në vendin tënd.
Jeronim Bazo
Aty shkojnë mbi 20 vende që dërgojnë ekipet e patrullimit dhe më lejoni t’ju them që në rastin e Shqipërisë ne këtu e kishim për herë të dytë. Për herë të parë kur shkuam, ishte viti 2013 në mos gaboj një ushtar nuk humbi rrugës si këta tanët por humbi rrugën gjatë stërvitjes, çfarë na dëshpëroi vërtetë. E morëm seriozisht gjithë këto vite për t’u përgatitur dhe për të marrë pjesë denjësisht dhe për të dalë faqebardhë nga 48 orëshi i kësaj stërvitje kaq dinjitoze që zhvillohet tradicionalisht në Mbretërinë e Bashkuar.
Për hir të së vërtetës ky ekip prej 11 vetash në mos gaboj, bashkë me komandantin e tyre doli këtë radhë faqebardhë, e mbylli patrullimin në lartësitë cambrian, ndërkohë katërshja dështoi ose nuk u paraqit në pikën e grumbullimit për t’u kthyer në atdhe”, shpjegoi ish-oficeri i lartë i ushtrisë.
Bazo tha në vazhdim se ka pasur edhe raste të tjera kur ndonjë ushtar është larguar pas përfundimit të stërvitjeve apo trainimeve. Ai përmendi si rast të fundit një largim rreth vitit 2000.
