Një 37-vjeçar shqiptar dhe një italiane 21 vjeç kanë përfunduar në prangat e policisë së Peskarës. Gjatë një kontrolli rutinë në makinën e tyre policia ka gjetur drogë, me vlerë tregu midis 500 e 700 mijë euro. Makina e tyre, ‘Ford Kuga’, me xhama të errët, është ndaluar nga policia rrugore, e cila bën kontrolle për të parë nëse shoferët kanë abuzuar me alkool apo drogë. Brenda makinës, të marrë me qira, është gjetur një ngarkesë marijuane, e cila me shumë mundësi ka qenë e sapoardhur me gomone, pasi sipas mediave lokale pakot ishin të lagura me ujë deti. Vajza me iniciale L. C., nga Monza, deklaroi se nuk kishte dijeni për drogën në makinë, ndërsa shqiptari A. S., rezident në provincën e Milanos, nuk dha asnjë përgjigje para policëve në burgun e Chietit, ku po mbahen aktualisht.
