Zbulohet identiteti i vërtetë i 37-vjeçarit Renato Omeri, të ekzekutuar mbrëmjen e sotme në qytetin e Vlorës.
Burime nga policia thanë se, ai ka përdorur dy emra zyrtar, ndërsa ka pasur edhe shumë të tjerë, por jo të regjistruar.
Sipas policisë, identiteti i parë i vërtetë i të ekzekutuarit është Marjen Xhaferaj, 37 vjeç, lindur në Vlorë dhe banues në Vlorë, Rajoni numër 5, lagjja ‘28 Nëntori’.
Por disa kohë më parë ai kishte ndërruar mbiemrin, pikërisht për shkak të të kaluarës së tij kriminale. Ai e kishte bërë emrin Marjen Omeri.
Të njëjtat burime thanë se ai ka përdorur edhe disa emra të tjerë, por jo të regjistruar në gjendje civile.
Njoftimi zyrtar i Policisë së Vlorës
Më datë 30. 07. 2017 rreth orës 21:15, jemi njoftuar së në një lokal në Lungomare ka pasur të shtëna me armë zjarri ku dyshohet se ka një person të vrarë.
Menjëherë në drejtim të vendit ku u dha Njoftimi kanë shkuar forca të shumta policie ku ka rezultuar se:
Shtetasi M. Xh., (O.,), 37 vjeç, është qëlluar me armë zjarri, për pasojë ka ndërruar jetë.
Viktima ka qenë në lokal i ulur me një tjetër, ku në drejtim të tij është afruar një person i cili e ka qëlluar me armë zjarri.
Autori është larguar më këmbë mes pallateve.
Policia ka ngritur menjëherë pika të shumta kontrolli ku në ndihmë të Policisë së Vlorës për kapjen e autorit kanë ardhur Delta Forcë e FNSH.
Vijon krehja e zonës për të bërë të mundur kapjen e autorit.
Grupi hetimor në vendngjarje po vijon punën për grumbullimin e provave, dëshmive me qëllim dokumentimin dhe identifikimin e autorit.
Në vendngjarje janë sekuestruar disa gëzhoja ndërsa disa metra më tutje është gjetur dhe sekuestruar një armë zjarri pistoletë që dyshohet se e dispononte viktima M. Xh. (O.).
Theksojmë se viktima ka ndërruar emër e mbiemër dhe rezulton me precedent kriminal.
Vijon puna për zbardhjen e plotë të rrethanave të ngjarjes, identifikimin dhe kapjen e autorit.
