Doracaj u bën thirrje studentëve: Zhvendosni gjendjen civile, ose do të gjobiteni

Çdo qiraxhi, student apo qytetar që nuk e ka gjendjen civile aty ku jeton realisht, duhet të regjistrohet aty ku jeton brenda datës 28 korrik. Nëse nuk e bën këtë, atëherë do të penalizohet me 10 mijë lekë të reja gjobë.
Drejtori i Përgjithshëm i Gjendjes Civile Bledar Doracaj, shpjegon në një intervistë për Report Tv se një qytetar mund të rrijë tranzit vetëm 30 ditë.
“Absolutisht brenda 30 ditëve nga momenti që zhvendos gjendjen civile nuk ka sanksion, apo masa administrative gjobë çdo gjë është pa pagesë. Studentët që jetojnë në konvikte kanë një kontratë me drejtorinë atje me këtë dokument edhe ai është dokument ligjor i lëshuar nga një zyrë shteti dhe me një kopje të kartës së identitetit mund të paraqiten pranë zyrave të gjendjes civile”, shprehet Doracaj.
Doracaj bën apel që qytetarët të shfrytëzojnë këtë kohë për t’ju shmangur penaliteteve.
“Ata qytetarë që nuk e zhvendosin gjendjen civile brenda afateve të përcaktuar brenda datës 28 korrik do të kenë penalitete, nga data 29 korrik nisin penalitet me 10 mijë lekë gjobë .Vetëm 3-4 minuta do të humbasë çdo qytetar për të zhvendosur gjendjen civile”, shton Doracaj.
Drejtori i Përgjithshëm i Gjendjes Civile thotë se do të ketë verifikim të imtësimshëm për këdo që shmang këtë detyrim.
“Besoj që ka perënduar dhe po perëndon koha kur shteti nuk e di ku i ka shtetasit e vet. Mekanizmat që shteti të marr vesh nëse ti i shmangesh një detyrimi ligjor janë të shumtë”, thotë Doracaj.
Çdo qytetar më një dokument që e lidh me banesën, pronësie apo kontratë qiramarrje dhe me një kopje të kartës se identitetit duhet të paraqitet vetëm në zyrën e gjendjes civile në zonën ku banon, jo në atë ku ka gjendjen civile. Për të përballuar fluksin zyrat e gjendjes civile do të punojnë edhe në fundjavë.

/DRONI.al/