Zbardhen detaje nga shpërthimi me eksploziv dje ne një lokal te Komuna e Parisit në Tiranë.
Ngjarja ndodhi në një lokal bastesh sportive, rreth orës 02:00, në rrugën “Medar Shtylla”, te “Komuna e Parisit”, në kohën kur ambienti ishte i mbyllur.
Burime zyrtare të Policisë së Tiranës thanë dje se një sasi prej rreth 50 gramë tritol ishte vendosur pranë gjeneratorit të energjisë elektrike, në verandën e lokalit.
Ambienti ku ndodhi shpërthimi prej disa kohësh administrohet nga 32-vjeçari Irid Dibra, i cili nga verifikimet nuk rezulton të ketë precedentë të mëparshëm, apo probleme me persona të tjerë.
Sipas Policisë, pronari i lokalit rezulton vetëm me një procedim të mëparshëm, për drejtim mjeti në gjendje të parregullt, në vitin 2015, çështje që është pushuar nga Prokuroria.
“Nga hetimet paraprake të kryera, rezulton se është vendosur një sasi e vogël lënde eksplozive, ku për pasojë është dëmtuar pjesa e prapme e gjeneratorit, si dhe janë thyer xhamat e një dyqani, që ndodhet pranë. Grupi hetimor po punon për sqarimin e plotë të rrethanave të ngjarjes dhe identifikimin e kapjen e autorëve”, tha zyrtarisht Policia.
HETIMI
Menjëherë pas marrjes së njoftimit për ngjarjen e ndodhur, shërbimet e Komisariatit nr.2 kanë rrethuar zonën dhe oficerët e Krimeve të Rënda kanë nisur hetimet për zbardhjen e ngjarjes.
Burime nga grupi hetimor thanë se është marrë në pyetje pronari i lokalit, shtetasi Irid Dibra, i cili ka deklaruar se nuk ka probleme me njeri dhe nuk ka marrë asnjë kërcënim. Sipas tij, ngjarja mund të jetë ndonjë formë paralajmërimi për të hequr dorë nga lokali, i cili kërkohet për t’u marrë me qira edhe nga persona të tjerë.
Megjithatë, burimet thanë se nuk përjashtohet mundësia që shpërthimi të ketë ndodhur për motive konkurrence, pasi në zonën ku ndodhi ngjarja janë të shumta lokalet e basteve sportive.
Ndonëse nuk rezulton person me probleme, Policia po verifikon edhe ndonjë konflikt që Dibra mund të ketë pasur për çështje personale, apo edhe me ndonjë prej klientëve që mund të ketë humbur para aty kohët e fundit.
