FOTO/ Zyrtarët e PD: Hapa ligjore për të bllokuar ndërtimet te ish-Parku

Drejtori i Departamentit për Mjedisin në PD, Jamarbër Malltezi dhe këshilltarët e djathtë në Këshillin Bashkiak akuzojnë kryetarin e bashkisë Veliaj se po prish lulishte për të betonizuar Tiranën.
“Është zona me ajrin më të ndotur në Tiranë. Cila është përgjigja e qeverisë së sotme? Prishi edhe të vetmin park që bashkia e shkuar kishte ndërtuar në zonë. Por ky park nuk është parku i vetëm, apo lulishtja e vetme që Edi Rama po i prish Tiranës. Janë të paktën 12 parqe dhe lulishte që kjo bashki i ka prishur Tiranës nën drejtimin e Edi Ramës dhe më pas nën drejtimin e Edi Ramës si kryeministër. Në rast se ne nuk reagojmë të gjithë parqet kthehen në pallate”, tha Malltezi.
Ndërkohë kryetari i grupit të këshilltarëve demokratë Leondard Olli tha se kjo është një kronikë e një masakre urbane të paralajmëruar.
Ai shtoi më tej se PD do të ndërmarrë hapa ligjorë për të parandaluar këto maskra të paralajmëruara: “Është një denoncim i përhershëm dhe do të vijojë të denoncohet me forcë nga Partia Demokratike e cila do të ndjekë të gjithë hapat ligjorë, duke filluar që nga pjesa e drejtësisë dhe referendumeve vendore, sikundër e tha Malltezi, për të shpëtuar edhe atë pak gjelbërim që ka mbetur në kryeqytet”, deklaroi Olli.
Ndërkohë, firma që po ndërton pallatin në emër edhe të pronarëve të truallit ka theksuar se leja është lëshuar në bazë të planit vendor të Tiranës, miratuar në vitin 2013 nga ish-kryetari i bashkisë në atë kohë, Lulzim Basha.
Ish-Parku i autobusëve duket si po i vjen fundi dhe qytetarët janë të thirrur në apel për të mbrojtur pasurinë e tyre publike.
Ashtu siç u paralajmërua edhe nga mediat para zgjedhjeve, Veliaj i kishte kërkuar kompanisë së ndërtimit që të frenonte punimet deri në datën 25 Qershor për shmangur mërinë e qytetarëve të Tiranës në kutitë e votimit dhe më pas ishte e lirë të procedonte.
Dy ditë më parë fadromat dhe gardhi rrethues mësynë ish parkun e autobusëve dhe nisën gërmimet, dhe qytetarët reaguan.

/DRONI.al/