Task forca nuk ndalet nga presioni, do monitorohet lëvizja e parave

Zyra e zv/kryeministres ka reaguar në lidhje me deklaratën e zëvendësministres së financave.

NJOFTIMI ZYRTAR
Zv./Ministrja Beqiraj në kapërcim të kompetencave të saj në kuptim të nenit 102(4) të Kushtetutës dhe nenit 6(2), të Ligjit 9000/2003 “Për organizimin dhe funksionimin e Këshilllit të Ministrave” si dhe nenit 5, të Ligjit 90/2012 “Për organizimin dhe funksionimin e administratës shtetërore” merr përsipër të flasë në emër të Ministrisë së Financave, institucion që drejtohet nga Ministri i Financave. Ky i fundit është titullari kompetent që drejton politikën shtetërore për fushën që mbulon punën administrative dhe kontrolluese në institucion.
Znj. Beqiraj në daljen në media ka vepruar gjithashtu në kundërshtim të hapur me Rregulloren nr. 17, datë 29.01.2016 “Për organizmin dhe funksionimin e Ministrisë së Financave”, miratuar nga Ministrit i Financave.
Kujtojmë se Znj. Beqiraj nuk është pjesë e hierarkisë së qeverisjes për sa kohë në ushtrim të kompetencave dhe në drejtim është Ministri i Financave.
Duket se Zv./Ministrja e Financave i bën këto dalje në media për të penguar zbatimin e VKM-së nr. 473/2017 me synimin për të mos lejuar monitorimin e pjesëmarrjes së administratës në zgjedhje dhe në mënyrë indirekte duke i bërë thirrje administratës të marrë pjesë në fushatën elektorale dhe të mos ketë frikë nga ligji.
Më tej shtojmë se në qoftë se Znj. Beqiraj ka në dijeni për qarkullim të parave të pista në të kaluarën apo të transaksioneve të dyshimta duhet të kishte njoftuar organet e hetimit që në momentin që është vënë në dijeni dhe jo të bëjë deklarata publike duke u përpjekur të sfumojë monitorimin që po bëhet nga Task Forca lidhur me paratë e dyshimta dhe tërheqjen e parave në bankat e nivelit të dytë për të cilat Task Forca është vënë në dijeni nga ana e
Koalicionit të Vëzhguesve Vendore, që janë organizata jo fitimprurëse me reputacion. Është detyrë e Task Forcës të monitorojë përdorimin e gjatë fushatës të parave dhe mjeteve të tjera financiare që vijnë si rezultat i veprimtarive të paligjshme duke iu referuar informacioneve që vijnë nga institucionet e shtetit dhe në asnjë rast nuk mund pengohet dhe nuk mund të vihet nën trysni nga askush.
Zëvendëskryeministrja Mandija siguron opinionin publik se është dhe do të jetë e vendosur për të përmbushur deri në fund misionin për monitorimin dhe garantimin e zhvillimit të një procesi zgjedhor të qetë, të lirë dhe të ndershëm dhe nuk do të vihet nën trysni nga asnjë presion politik në ushtrimin e detyrës së saj.

/DRONI.al/