Specialistët e Seksionit për Hetimin e Trafiqeve të Paligjshme, në Drejtorinë Vendore të Policisë Elbasan, në kuadër të një hetimi të ndjekur me metoda speciale të hetimit, finalizuan me sukses operacionin policor të koduar “Dinamo”. Si rezultat i këtij operacioni të finalizuar në sajë të një pune intensive hetimore dhe të kryer në bashkëpunim me Prokurorinë e Rrethit Gjyqësor Elbasan, u bë arrestimi në flagrancë i Engjëll. H., 62 vjeç, banues në Elbasan.
Arrestimi i tij, u bë pasi gjatë kontrollit të ushtruar në banesën e tij, i janë gjetur dhe sekuestruar arsenal armësh, municione luftarake dhe vlera monetare. Ky person dyshohet të ketë pasur për qëllim trafikimin e armëve dhe municioneve luftarake në vlera të ndryshme monetare.
Grupi hetimor i ka gjetur dhe sekuestruar në cilësinë e provës materiale
1 armë zjarri automatik, model 56, kalibër 7.62 mm, me krehër të vendosur në të me 29 copë fishekë.
1 armë zjarri pushkë model 63, kalibër 7.62 mm, me krehër të vendosur në të me 25 copë fishekë.
1 pushkë sportive shul, me krehër të vendosur në të me 3 copë fishekë.
131 copë kartëmonedha me prerje 1000 lekë (131000 lekë të reja).
6 kuti me fishekë model 54, kalibër 7.62 mm, me nga 100 copë fishekë secila.
45 copë fishekë pushkë sportive.
30 copë fishekë model 56, kalibër 7.62 mm.
173 copë fishekë model 54, kalibër 7.62 mm.
1 armë e ftohtë thikë.
2 aparate telefoni të markave të ndryshme.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën, “Prodhimi dhe mbajtja pa leje e armëve luftarake dhe e municionit”, “Trafikimi i armëve dhe i municionit” dhe “Prodhimi dhe mbajtja pa leje e armëve të ftohta”.
