12 vjet pasi braktisi Universitetin Harvard për të themeluar Facebook, Mark Zuckerberg iu rikthye shkollës, për të marrë një diplomë nderi e për të mbajtur një fjalim para studentëve të sapodiplomuar. Zuckerberg inkurajoi studentët të krijojnë qëllime për veten, ndërkohë që nuk munguan as momentet emocionuese apo lotët në fjalimin e tij.
Mark Zuckerberg është rikthyer në Universitetin e Harvard nën qiejt gri, për të dhënë një fjalim diplomimi si dhe për të marrë një diplomë nderi, 12 vjet pasi braktisi një nga shkollat më të famshme në botë, për të themeluar Facebook, një nga mediat sociale më të përdorura në glob. Në fjalimin e mbajtur përpara studentëve të sapodiplomuar, Zuckerberg kërkoi që ata jo vetëm të krijonin punë të reja, por të krijonin gjithashtu një ndjenjë qëllimi. Jetojmë në kohë të paqëndrueshme, vijoi Zuckerberg, kjo është sfida e kohës tonë. Forcat e lirisë, hapjes dhe komunitetit global kundër forcave autoritariane, të izolimit dhe nacionalizmit. Ekspertët politikë mendojnë se me këtë fjalim, Zuckerberg mund ta ketë pozicionuar veten si kandidat të ardhshëm për president.
33-vjeçari ndau me publikun momente të vështira që ai kishte kaluar në fazat e para të zhvillimit të Facebook, por edhe momente romantike, duke e konsideruar takimin me bashkëshorten e tij, si gjënë më të mirë që i kishte ndodhur në Harvard. Nuk munguan as të tjera momente emocionuese nga fjalimi i Zuckerberg. Teksa tregonte historinë e një gjimnazisti, emigrant të padokumentuar, që frikësohej se nuk do të mund të regjistrohej në universitet, sytë e 33-vjeçarit u mbushën me lot.
Më shumë se 1.3 milionë persona e përdorin Facebook çdo ditë. Që prej themelimit në 2004, Facebook ka frymëzuar shumë media të tjera sociale konkurruese si Tëitter, Snapchat dhe Instagram.
