ANALIZA/ A do të ndikojë shtyrja e votimeve në Kavajë për të zgjidhur krizën politike në Shqipëri?

Mazhoranca këmbëngul që zgjedhjet parlamentare duhet të mbahen më 18 qershor, kurse opozita ka paralajmëruar protestë masive në Tiranë për plotësimin e kushtit për qeveri teknike.

Ndërprerja e procesit të votimit për kryetarin e Bashkisë së Kavajës, nga tërheqja e kandidatit të mazhorancës, duket sikur ka zbutur tensionin politik, por pas këtij vendimi, nuk ka shenja konkrete për rifillimin e dialogut. Nga votimet e pjesshme të parakohshme të Kavajës tani fokusi është tek zgjedhjet e përgjithshme parlamentare të 18 qershorit. Mazhoranca po këmbëngul për zhvillimin e tyre, qoftë dhe pa pjesmarrjen e opozitës. Ndërkohë që PD dhe koalicioni i djathtë pas rreth dy muaj e gjysmë protestë vijojnë të kërkojnë qeveri teknike dhe më pas zhvillimin e votimeve parlamentare.

Basha: Zgjedhje të lira e të ndershme me një qeveri teknike
Kryetari i PD-së Luzim Basha e përshkroi  tërheqjen e mazhorancës nga Kavaja jo si dhuratë, apo lëmoshë, por si sprapsje “të detyruar nga refuzimi masiv i kavajasve për t’u keqpërdorur dhe sprapsje e tmerruar nga bashkimi masiv i shqiptarëve që ishin bërë gati të marshonin në Kavajë dhe të çlironin republikën e të sillnin Republikën e Re”.
Basha ju tha mbështetësve të mbledhur në çadrën e ngritur ngjitur me kryeministrinë të shtunën, se në datën 13 maj do të ketë një protestë paqësore masive për të rikonfirmuar kërkesën e opozitës për zgjedhje të lira dhe të ndershme, por pas ndërtimit të një qeverie teknike. Për shefin e opozitës nuk do pranohen kurrë “zgjedhje të diktuara nga krimi droga e pa opozitën dhe se të vetmet zgjedhje që ky vend do të mbajë, do të jenë zgjedhjet e të lira e të ndershme nga droga, krimi monizmi me një qeveri teknike e cila do të përmbushë mandatin popullor për zgjedhje të lira e të ndershme”.

Rama: Më 18 qershor qytetarët do japin mesazh se rruga jonë është Europa
Duke shfrytëzuar pjesëmarrjen në një veprimtari që u zhvillua të shtunën në mbrëmje, në kuadër të Javës Evropiane, kryeministri tha se vendi aktualisht është në udhëkryq, duke evidentuar pengesa dhe barrikada për zbatimin e reformës në drejtësi. Duke u ndalur tek procesi i integrimit europian të Shqipërisë, Rama, shprehur bindjen se në këtë udhëkryq do të fitojë e ardhmja dhe nuk do të imponohet e shkuara.
“Do të fitojë Evropa në zemrat dhe në vullnetin e shqiptarëve dhe nuk do të fitojë kundërvënia ndaj saj nga frika dhe tmerri për drejtësi. Kjo është sfida për të cilën jemi të përkushtuar, shpresojmë dhe që kjo periudhë e brendshme politike shpresoj ta kalojmë. Udhëkryqin politik ta kapërcejmë në mënyrë të njerëzishme. Ne do ja dalim siç jam i bindur që me 18 qershor qytetarët do të japin një mesazh që rruga jonë është Europa dhe nuk mund të shtyhet më tepër në kohë”.

Vlahutin: Jepuni qytetarëve shqiptarë të drejtën e tyre kushtetuese për të votuar
Pas shtyrjes së votimeve në Kavajë vijojnë dhe reagimet e ndërkombëtarëve si apelim për reflektim nga klasa politike në gjetjen e konsensusit. Pas reagimeve të ambasadave të Gjermanisë, SHBA-ve dhe Britanisë së Madhe, të shtunën u prononcua dhe shefja e Delegacionit të BE-së, Romana Vlahutin. Ambasadorja Vlahutin tregoi siguri se, sipas saj, do të ketë guxim e mençuri të mjaftueshme dhe kurajo në gjithë politikën shqiptare, që të gjenden mënyra të arsyeshme për t’u dhënë gjithë qytetarëve shqiptarë të drejtën e tyre kushtetuese për të votuar partinë të cilën ata zgjedhin.
“Kjo nuk duhet të jetë dhe nuk ka për të qenë bllokim i ambicies për integrimin në BE. Çdo gjë që ne si BE bëjmë bëhet për qytetarët e Shqipërisë. Besoj në mënyrë absolute që gjithçka kanë për të bërë politikanët shqiptarë kanë për ta bërë për qytetarët e këtij vendi. Është më e lëhtë të luftosh apo të zihesh për diçka sesa ta ndërtosh atë”.

Vendimi për votimet në Kavajë, një akt të fortë politik
Pedagogu i fakultetit të Drejtësisë në Universitetin e Tiranës, Sokol Hazizaj, e shikon me pasoja vendimmarrjen politike ne kurriz të respektimit të ligjit për kryerjen e procesit zgjedhor. Hazizaj shprehet për Deutsche Welle-n se dështimi  i realizimit të një procesi zgjedhor siç janë votimet për bashkinë e Kavajës, vjen për pasojë të mungesës së përdorimit të instrumenteve politikë të dialogut, dhe nga ana tjetër nga mungesa e dëshirës dhe vullnetit për të respektuar  kushtetutën.
“Në këtë kuptim pasojat e dështimit janë më të mëdha se sa vështrimi politik. Pasoja vjen haptazi dhe në keqpërdorimin nga politika të financimeve të procesit, të cilat janë më shumë se të konsiderueshme. Dështimi tre dimensional i zgjedhjeve në Kavajë është kushtetues, politik, pse jo dhe paralajmërim serioz i realizimit të një procesi të dështuar të zgjedhjeve politike më18 qershor 2017 dhe më pas”.
Nga arbitrariteti aktual i politikës shqiptare, sot kushtetuta është joekzistente, pasi nuk funksionon kapitulli i saj universal i të drejtës për të zgjedhur dhe për t’u zgjedhur.
Analisti i medias, Elton Metaj, e shikon lëvizjen e fundit të mazhorancës në garën për Bashkinë e Kavajës si një akt të fortë politik, që sipas tij evitoi krijimin e një tensioni të rrezikshëm. Metaj shikon dy elementë nga ky zhvillim. Së pari, se realizimi i zgjedhjeve pa opozitën bart rrezikun e shtuar të tensioneve të larta, që të provokuara fare pak të çojnë te dhuna. Shqipëria ka një histori jo të mirë në këtë drejtim. Element i dytë në analizën e Metajt për Deutsche Welle-n, lidhet me arsyetimin e kryeministrit se në Kavajë kishte një plan destabilizimi të vendit.
“Nëse ky plan është real, kryeministri duhet të veprojë si drejtues i qeverisë, nëpërmjet strukturave të sigurisë. Nëse kjo nuk ndodh, atëherë jemi duke përdorur sigurinë kombëtare për retorikë dhe lëvizje politike. Java e ardhshme do të jetë vendimtare për zgjidhjen e krizës, pasi z. Rama ka deklaruar se prej dates 8 maj nuk do të ketë më negociata, ndërsa opozita ka lajmëruar  protestë popullore më 13 maj në Tiranë”.
Sipas tij java që vjen mund ta çojë krizën në “temperaturën e pjekjes”, duke shtyrë drejt zgjidhjes. Metaj parashikon se ditët që vijnë “ndoshta do të përkeqësojnë krizën, duke e galvanizuar dhe duke e ndihmuar të zgjidhet”. DW

/DRONI.al/