Ministri turk i Bujqësinë, Ushqimit dhe Blegtorisë, Faruk Çelik vijoi presionin e qeverisë turke ndaj Shqipërisë në lidhje me kufizimin apo bllokimin e biznesve dhe veprimtarisë së organizatës FETO në Shqipëri, organizatë që kjo e drejtuar nga Fejtullah Gylen që akuzohet se organizzai grushtin e shtetit në Turqi verën e shkuar.
Gjatë një vizite zhvilluar dje në Tiranë, Çelik mori pjesë edhe në Forumin e Agrobiznesit Shqipëri-Turqi ndërsa duke folur për një agjenci turke u deklarua për të ashtuquajturin rreziku FETO në Shqipëri.
Çelik ka theksuar se Turqia ndjeshmërinë e çështjes së FETO-s e ka ngritur në të gjitha takimet e niveleve më të larta, duke vënë në dukje se Shqipëria është një nga qendrat e paqes në rajon dhe se stabiliteti dhe qetësia e këtij vendi është e rëndësishme edhe për rajonin.
Duke paralajmëruar qytetarët shqiptarë në lidhje me rrezikun që paraqet FETO sipas tij, Çelik tha: “Duhet të bëjnë shumë kujdes. Faktikisht në këtë pikëpamje Shqipëria po kalon në një kohë shumë të ndjeshme. Duket qartë që një organizatë terroriste si FETO, pasi kuptoi që në Turqi nuk do t’ja arrijë dot qëllimit të saj, është duke u përpjekur shumë për t’i gjetur vetes vende dhe ambiente të reja.”
“Nëse do të shohim shkollat dhe lëvizjet e tyre brenda dhe jashtë vendit shohim qartë se një nga këto vende është edhe Shqipëria. Ajo që është e rëndësishme është që drejtuesit të jenë në dijeni të kësaj. Më pas dhe ne bëjmë çfarë të jetë e nevojshme. Pjesa tjetër është një çështje që i takon krejtësisht shtetit tuaj, por ne si vëllezër duhet të themi atë që na takon. Unë shpresoj që këtu të mos ketë këmbëngulje në lidhje me këtë gjë dhe ajo që do të ishte më e drejta këtu është thirrja ndaj familjeve që të kujdesen për fëmijët e tyre”, tha Çelik.
