Luan Rama i LSI këmbëngul: Zgjedhje pa opozitën nuk mund të ketë

Me opozitën përballë ose jo, në aleancë me LSI ose jo, PS është e vendosur të shkojë në zgjedhje me 18 Qershor. Numri dy i Partisë Socialiste, Gramoz Ruçi është i bindur.
Por Lëvizja Socialiste për Integrim mendon ndryshe. Me afrimin e zgjedhjeve, ajo po e qartëson qëndrimin e saj. Kryetari i Grupit Parlamentar, Luan Rama thotë në një intervistë për TV “Klan” se pa opozitën s’ka zgjedhje.
Por edhe pse LSI thotë se s’ka zgjedhje pa opozitën, ajo ka bërë kërkesë për t’u regjistruar në KQZ për garën e 18 Qershorit, kërkesë që do të miratohet të mërkurën.
Teksa zyrtarizohet si konkurrente në garë, ajo nuk ka marrë ende vendim nëse do të jetë sërish me Partinë Socialiste në aleancë.
Dy aleatët nuk dihet ende nëse do të jenë së bashku as në zgjedhjet e pjesshme të 7 majit në Kavajë. LSI ka kritika për mënyrën si u menaxhua Kavaja dhe thotë kjo zonë s’do të bëhet modeli i zgjedhjeve pa opozitën.
Më herët deputeti socialist Gramoz Ruçi deklaroi se Partia Socialiste do të shkojë në zgjedhje jo vetëm pa opozitën, por qoftë edhe pa Lëvizjen Socialiste për Integrim, nëse kjo e fundit refuzon.
Ruçi ndodhej në Libofshë të Fierit, kur u pyet nga gazetarët për zgjedhjet.
Nuk është vendosur ende nga Lëvizja Socialiste për Integrim se çfarë do të bëhet në zgjedhjet e Qershorit. Partia Socialiste ka shprehur vullnetin për të vazhduar me aleatët për zgjedhjet e 18 Qershorit, deklaroi Ruçi.
Por sipas kryetarit të Grupit Parlamentar, Partia Socialiste është e vendosur të futet në zgjedhje, me ose pa LSI.  Sipas tij, Partia Socialiste është e vendosur të futet në zgjedhje si forcë fitimtare.
Kryeministri Rama i ka kërkuar LSI-së vazhdimisht të qartësojë vendimin e saj, një vendim që duket se partia e Ilir Metës do ta marrë në muajin Prill, atëherë kur përfundon edhe kontrata e nënshkruar 22 Prillin e vitit 2013 në Shkodër.

/DRONI.al/