VIDEO/ Te pallatet e Gjushit arkeologët zbulojnë varret e hershme

Sondazhet arkeologjike në kantierin e ndërtimit të sheshit të ri të Durrësit, “Veliera”, kanë nxjerrë në dritë disa varre dhe struktura murale.
Deri më tani janë zbuluar 3 varre, për të cilat po punohet që të kryhet dokumentimi i plotë i tyre. Po ashtu janë zbuluar struktura që presin të datohen në vijim.
Kjo është një ndër tre pikat ku po kryhen sondazhe arkeologjike. Në dy prej tyre puna ka nisur këto ditë, pas dokumentimit të bastionit osman, të zbuluar rreth dy muaj më parë. Sipas arkeologëve njëri prej sondazheve do të kryhet për zbulimin e murit rrethues të qytetit, mbuluar me çakull në janar të këtij viti, përpara se të kishte një kontratë zyrtare midis bashkisë dhe ministrisë së Kulturës.
Deri në këtë pikë të gërmimeve arkeologjike, nuk ishte dokumentuar asnjë varr i zbuluar. Por “Amfora.al”, disa ditë përpara se të lidhej kontrata e vonuar prej dy muajsh, midis bashkisë Durrës dhe institucioneve të kulturës, dokumentoi praninë e një “strukture”, që sipas arkeologëve që prej vitesh e eksplorojnë nëntokën e Durrësit, kishim të bënim me një varr. Ai u largua nga sheshi së bashku me dherat dhe vendndodhja e tij ishte pak metra larg varreve të zbuluara këto ditë.
Njëri prej varreve të zbuluara këto ditë, ka strukturë të ngjashme me atë që u zbulua në qershor 2016-të, ngjitur me murin e kalasë, që sipas arkeologes, Dr. Brikena Shkodra Rrugia, ky varr mund t’i përkiste periudhës së mesjetës së hershme.
Zbulimi u bë në kuadër të një projekti për krijimin e një harte arkeologjiek GIS (Sistem Informativ Gjeografik), mbi monumentet e zbuluara dhe mbulura në Durrës, nga arkeologë shqiptarë dhe francezë, që zbuluan shtresa të reja të qytetit antik, nën ndërtimet romake. Amfora.al