Basha: Natë për natë e ditë për ditë, ‘Rama ik’!

Kreu i PD-së Lulzim Basha ka qenë sërish pasditen e sotme në çadrën e protestës, para kryeministrisë.
Në fjalën e tij, fillimisht Basha denoncoi dhunën ndaj dy motrave dje në Fier, pse ato kishin marrë pjesë në protestën e opozitës.
“Dua ta nis me një lajm të trishtë. Dje (pardje) bandat kanë sulmuar barbarisht dy vajza, dy motra binjake nga Fieri. Kanë sulmuar Antoneta dhe Gladiola Hatillari sepse në 18 shkurt ishin këtu bashkë më dhjetëra qindra vajza nga Fieri dhe gjithë Shqipëria. Dje (pardje) policia ka ngritur dorën ndaj këtyre vajzave sepse ishin pjesë e jona. E patë në zgjedhjet e 2015 dhe në zgjedhjet e Dibrës. Bandat e drogës dhe të krimit kanë guximin të godasin qytetarët vetëm sepse duan që japin votën si qytetarë të lirë. Policia dhe gjykatat nuk duhet të kthehen në mburojë të bandave”, denoncoi Basha.
“Policia ka afat deri në orën 00.00 të mesnatës së sotme për të arrestuar autorin, të cilin e njeh shumë mirë”, u shpreh Basha.
Më pas ai u ndal te përpjekja e qeverisë për të lidhur protestën e opozitës me përpjekjen për të penguar Vettingun.
“E do Vettingun Rama që solli në Parlament Arben Ndokën, Armando Prengën e Mark Frrokun dhe nuk e dashka opozita dhe populli. E do Vettingun Saimir Tahiri i cili vuri në dispozicion makinën e tij private për trafik droge nga Habilajt. Ndaj e do Vettingun, të kapë prokurorinë siç kapi prokuroren e Fierit që mbylli dosjen ndaj Habilajve. E do Vettingun Erion Veliaj që një ditë po e një ditë jo, drekon e darkon me prokurorin e çështjes Gjoklaj, për mbylljen e kësaj dosje”.
Më pas Basha sulmoi edhe shoqatat që janë angazhuar për mbledhje firmash për Vettingun.
“Ku ishin këto shoqata kur parlamenti mbushej me kriminelë, kur vendi mbushje me drogë?”, u shpreh Basha.
“Në nuk do të ndalemi, natë për natë, ditë për ditë, do të kërkojmë ‘Rama ik’!”, përfundoi Basha.
DRON.al

/DRONI.al/