Ilir Meta sqaron se përse “mbajti anën” e Llallës në përplasjen me ambasadorin Lu

Kreu i Kuvendit, Ilir Meta ka folur sot në “Top Story” për përplasjen Llalla-Lu. Ai sqaroi se përse ka mbajtur anën e Prokurorisë në këtë përplasje.
Meta tha se nuk është palë me askënd, përveçse me transparencën. Sipas tij, Kuvendi nuk ka vërejtur asnjë shkelje deri më tani në shortin për anëtarët e KED.
INTERVISTA
Kush është koka e çmendur që po çmend  vendin?
Unë besoj se irracionaliteti në politikë dhe në debatin publik është fenomeni që duhet të na tërheqë vëmendjen për të qënë më të qetë dhe më racional, për këtë fenomen që ka shkruar Agolli 25 vjet më parë. Dhe unë kam patur fatin që kam qënë i ulur pranë tij në Parlament. Ai shkroi në atë kohë disa vargje që sot janë aktuale.
Çfarë ndodhi javën e kaluar?
Tensioni publik ka qenë i nxehtë. Sa i takon Agollit, unë do të bëj një libër dhe i kam premtuar Sadijes se do të shkruaj të gjitha kujtimet për të. Ishte një mesazh për të qetësuar debatet. Edhe mediat i ndezin gjakrat më shumë sec duhet ndonjëherë.
Ajo konferencë për shtyp, ishte në fakt momenti kur ju u bëtë palë në një konflikt të paprecedentë?
Unë jam palë vetëm me transparencën dhe me të vërtetën. Sidomos kur bëhet fjalë për një proces si shorti i KED. Dhe natyrisht, deri sa ngrihet një debat i fortë në publik, qoftë edhe për shkak të shqetësimeve të ngritura nga një ambasador i nderuar dhe i veçantë si Lu dhe opinioni  e përcjell këtë shqetësim me interes, atëherë unë kam ndjerë për detyrë, thjesht të bëjë transparencë maksimale gjatë procesit edhe pas procesit kur ishte edhe kontestimi më i madh. Kam kërkuar të dhëna nga Prokuroria dhe pres akoma që nëse ndonjë prokuror apo prokurore është rreshtuar nga e drejta apo nga mundësia që jep ligji i bërë nga Kuvendi dhe partnerët, pra nëse dikush nga këta është përjashtuar padrejtësisht nga Prokuroria, dhe plotëson kriteret, atëherë ju do të shikoni që unë do të kem një qëndrim krejt tjetër. Deri tani në këtë proces, nuk na ka rezultuar ndonjë shkelje.

/DRONI.al/