Një milioner izraelit që ka investuar në Kosovë u arrestuar sot me dyshimin se ka kryer korrupsion në dhjetëra miliona dollarë. I është Beny Steinmetz, pronar i “Benny Steinmetz Group Resources Ltd”(BSG) një ndër aksionerët kryesorë të Ferronikelit, një minierë e rëndësishme për ekonominë e Kosovës, shkruan koha.net.
Steinmetz dyshohet për dhënien ryshfet zyrtarëve në Guine dhe për pastrim të parave. Shtëpia dhe zyra e tij janë bastisur sot në mëngjes nga policia. Ai është dërguar në arrest shtëpiak nga një gjykatë izraelite.
Dy pasaportat e tij, izraelite dhe franceze, u konfiskuan dhe atij i është ndaluar që të largohet nga Izraeli për 180 ditë. Po ashtu, atij i është caktuar edhe një gjobë prej 50 milionë shekelë (valutë izraelite) para të gatshme (mbi 12 milionë euro) dhe 50 milionë shekelë shtesë me prona. Këtë gjobë duhet ta paguajë brenda tri ditëve.
Beny Steinmetz zotëron një kompani minerare që kishte fituar të drejtat minerare në Guine.
Ai dhe disa izraelitë të tjerë janë të dyshuar se kanë paguar ryshfet dhjetëra miliona zyrtarëve në Conakry, kryeqyteti i Republikës së Guinesë, në këmbim të mbështetjes së tyre për të marrë në administrim bizneset minerare në këtë vend.
Hetimi është duke u zhvilluar së bashku me zyrtarët e zbatimit të ligjit nga Shtetet e Bashkuara, Zvicra dhe Guineja, si pjesë e një shtytje botërore të udhëhequr nga Organizata për Bashkëpunim Ekonomik dhe Zhvillim (OECD) për të adresuar korrupsionin zyrtar në shtetet anëtare, raporton “Haaretz”.
Sipas disa raportimeve, konkurrentët e Steinmetzit kanë shpenzuar miliona për të krijuar një komplot kundër tij dhe për të parandaluar një nga filialet e tij e cila ka fituar kontratë lakmuese.
Ende nuk ka asnjë të dhënë që biznesmeni i madh izraelit të ketë paguar edhe në Kosovë ryshfet për të marrë në pronësi minierëne rëndësishme të ferronikelit në këtë vend, raporton droni.al
