DETAJE/ Vajza përfundoi me dëshirë në shtrat me dy djem, sajoi rrëmbimin dhe përdhunimin

Zbardhen të tjera detaje mbi lajmin e përdhunimit të një 22-vjeçareje e cila tha se dy meshkuj që nuk i njihte, e kishin rrëmbyer dhe kishin abuzuar me të.
“Panorama” mëson nga burime zyrtare brenda Policisë, se e reja është njohur në rrjetet sociale me njërin nga djemtë që e akuzon për abuzim. Pas bisedave në Facebook, ata kishin lënë të takoheshin për t’u njohur nga afër. Por ditën e takimit, ajo nuk është njohur vetëm me të, por edhe me një tjetër djalë.
Me vullnetin e saj të plotë, dhe e vetëdijshme, vajza ka pranuar të dalë për një pije në shoqërinë e dy djemve dhe më pas të tre kanë përfunduar në shtëpinë e njërit prej djemve.
Mësohet se ajo ka shkuar me dëshirë në banesë, dhe jo me sy të mbyllur sic ka bërë denoncimin. Vajza më pas ka sajuar historinë e rrëmbimit dhe Policia tani po e heton për kallëzim të rremë.

Dëshmia e vajzës
Burime nga Policia thanë se shtetasja 22-vjeçare me iniciale E. Q. është paraqitur vetë paraditen e së shtunës në Komisariatin nr. 4, ku ka treguar se çfarë i kishte ndodhur mbrëmjen e së premtes. Vajza ka treguar se po kthehej në shtëpi në darkë, duke ecur në këmbë përgjatë rrugës “Myslym Keta”, raporton “Panorama”.
Disa metra para se të arrinte te lagjja ku banon, një makinë i ka ndaluar para këmbëve dhe dy persona kanë zbritur duke futur me forcë brenda në makinë. Ajo tregon se autorët i kanë mbyllur gojën dhe sytë dhe nuk ka arritur të kërkojë ndihmë, apo të shohë rrugën se ku po e dërgonin.
Sipas deklarimeve të saj, rruga me dy autorët ka zgjatur shumë pak minuta, deri te një shtëpi e braktisur ku ata e kanë dërguar. Por vajza tregoi se nuk e di se ku ndodhet kjo shtëpi, pasi nuk e ka parë rrugën kur ka shkuar apo kur e kanë larguar nga aty. Më pas, ajo tregon se të dy personat që e rrëmbyen, kanë kryer marrëdhënie seksuale me të kundër dëshirës së saj.
Në fund, teksa e kanë dërguar sërish në rrugën ku e kishin marrë me makinë, e kanë kërcënuar që të mos e denonconte ngjarjen në polici, pasi do të hakmerreshin keq me të. Burimet thanë se deklarimi i vajzës është marrë në prezencën e një psikologeje të Drejtorisë së Policisë së Tiranës, për shkak të gjendjes së rënduar.

Dyshimet e Policisë
E pyetur për dy autorët, në mënyrë që të jepte ndonjë përshkrim fizik të tyre, 22-vjeçarja ka treguar se nuk e ka parë asnjërin nga personat, pasi gjatë gjithë kohës i ka pasur sytë e lidhur.
Burimet thanë se nisur nga kushtet fizike të vajzës, faktit se ajo nuk kishte shenja të dukshme dhune, por edhe faktit që ngjarja është denoncuar të nesërmen, jo atë natë që ka ndodhur, po shihet me dyshime nga ana e policisë.
Nuk përjashtohet mundësia që denoncimi i shtetases E. Q. të jetë edhe ndonjë lloj hakmarrjeje e mundshme ndaj ndonjë personi, që mund të jetë i dashuri apo ish-i dashuri i vet.
Megjithatë po kryhen të gjitha hetimet e nevojshme për zbardhjen e rrethanave reale të ngjarjes dhe identifikimin e autorëve.

/DRONI.al/