“Dua tritol të kryej masakra, kam qejf të bëhem terrorist e të vras deputetët”

25-vjeçari jetim që kërkon të hidhet nga një vinç tek kantieri i ndërtimit tek stadiumi “Qemal Stafa” në Tiranë, i ka dërguar mesazh gazetarit Enrik Mehmeti. (Zbulohet kush është djali që kërkon të hidhet nga vinçi, “Shteti më akuzon se kam qëlluar babanë”). Erjon Selimaj i ka shkruar atij se nëse nuk zgjidhej çështja e strehimit, ai do të kryente masakra duke kërcënuar se do të vriste pushtetarët.

Në një sms tjetër, ai shkruan se kërkon të gjejë tritol dhe të hedhë veten në erë, pra gjendja e vështirë ekonomike në të cilën ai ndodhet e ka detyruar që të mendojë për akte terroriste. “Jam jetim, jam pa bukë, qeveria më ka lënë rrugëve. Kam nevojë për ndihmë”, mësohet se është shprehur ai, sipas dëshmitarëve.

Në vendngjarje janë forcat e Policisë së Tiranës dhe zjarrëfikësja si dhe është bllokuar rruga që të çon në këtë zonë. “Jam një djalë jetim që e quajnë Erjon Selimaj do të vrasë një pushtetar për arsye se nuk i japin strehim. dhe një ditë do vij kam qeft ë bëhem terrorist të vras deputet e pushtetarë që nuk ndihmojnë jetimët. Mendoj të jap jetën time që të vihet drejtësia për të pastrehët për të braktisurit për jetimët. dhe unë dola me qëllim në TV që kur të bëj masakrën të njihem si Erjoni jetim që kërkonte strehë dhe shteti nuk ja jepte. dhe dita ditës po mendoj se si të realizoj këtë plan që kam. Po mendoj ku të gjej një sasi tritoli dhe të hidhem në erë dhe jo vetëm në qoftë se shteti nuk më ndihmon unë do bëhem terrorist”, shkruante Erjon Selimaj.

Pra, ngjitja sot e Erjonit është një akt i paralajmëruar, madje ai këtë ua ka thënë edhe të tjerëve, por askush nuk e ka besuar se do e bënte realisht këtë akt, duke menduar se ai po bënte shaka. Ndërkohë, nga transmetimet “live” shikohet që 25-vjeçari nuk ka ndërmend që të zbresë, por ka ndërruar vend që mos ta shqetësojnë nga poshtë me thirrje. Atë fillimisht e kanë bindur që të zbresë, por mesa duket dikush tjetër ka ndikuar për keq dhe 25-vjeçari është ngjitur sërish.

/DRONI.al/