Bledi Çuçi i sinqertë: Ka pasur mosrealizim të ardhurash

Buxheti i shtetit ka mbledhur më pak të ardhura se plani si pasojë e performancës së dobët të pushtetit vendor në 8 muajt e parë të 2016.
Ky fakt është pranuar edhe nga ministri për Çështje Vendore Bledi Çuçi, i cili ka deklaruar se për të analizuar faktorët realë duhet që të mbyllet viti fiskal. Taksa e pasurisë është një prej zërave më problematikë për sa i përket mbledhjes së të ardhurave. Në 8 muajt e parë të këtij viti pushteti vendor ka krijuar gropën më të madhe të mosrealizimit në buxhet i cili arriti në  4.5 miliard lekë.
“Është shpejt për të folur sepse viti fiskal ka edhe tre muaj të rëndësishëm  për sa i përket kësaj gjëje, sepse janë edhe tre muaj. Kështu që kjo është një gjë që ta diskutojmë në fund të vitit që të shohim sesi ka rezultuar performance fiskale. Megjithatë sigurisht që ne në këtë vit po bëjmë edhe ligjin e financave vendore që në një farë mënyrë do të disiplinojë edhe më shumë, do të japi diskrecione edhe më tepër bashkive në mbledhjen e të ardhurave”, shprehet Çuçi.
Ndërkohë në lidhje me djegien e mbetjeve në disa qytete ministri Bledi Çuçi thekson se problem mbetet ky fenomen sidomos në zonat turistike ndërsa ligjin për importin e mbetjeve e sheh si një mundësi për displinim të këtij fenomeni.
“Besoj se djegia e mbetjeve nuk është një fenomen i ri në Shqipëri. Fatkeqësisht na ka shoqëruar në të gjitha këto vite tranzicioni. Situata sigurisht akoma nuk jemi aty ku duhet të jemi sidomos në zonat turistike që nuk duhet ta diskutojmë më këtë problem, por është shumë më mirë seç ka qenë”, shton ministri. 

/DRONI.al/