Çudit ministri Tahiri: Për vjedhjen në Rinas, “fajin” e ka Presidenti Nishani

Ministri i Punëve të Brendshme, Saimir Tahiri deklaroi publikisht se ‘fajtor’ për grabitjen e ndodhur pak kohë më parë në Rinas, është pikërisht presidenti Bujar Nishani. Tahiri tha se firma konçensionare nuk kishte marrë masa për të garantuar sigurinë pavarësisht shkresave të vazhdueshme të policisë, ku sugjerohej pikërisht kjo gjë.
Sipas ministrit marrëveshja me këtë konçensionar duhet rishikuar dhe duhet të ndryshojë pasi paraqet rrezik real të sigurisë kombëtare. Sipas Tahirit, miratimi i ligjit për sigurinë shtesë, i kthyer nga Presidenti dhe i rrëzuar në Komisionin e Sigurisë, do të kishte ndihmuar në evitimin e kësaj grabitje.
“Për grabitjen në Rinas, unë do të doja që t’i bëja me dije publikut disa rrethana që mund të zgjidheshin fare mirë me ligjin për sigurinë publike, për masat shtesë të sigurisë publike dhe për të cilat unë do të vazhdoj të bisedoj me deputetët e komisionit të sigurisë, do vazhdoj të bisedoj me të gjithë aleatët e PS në mazhorancë sepse realisht besoj që ai ligj duhet të miratohet dhe do këmbëngul deri ditën e fundit të detyrës sime, që të bind çdo deputet në parlamentin e Shqipërisë, edhe opozitën po të më duhet, që ai ligj të miratohet…. Mbetet për t’u riparë në komision. Unë besoj që ka nevojë për komunikim me deputetët e komisionit të sigurisë ashtu si dhe me deputetët e tjerë të mazhorancës, pse jo edhe të opozitës. Unë mendoj se është një ligj që mungesa e të cilit, padrejtësisht po shkakton këto pasoja në Shqipëri”, u shpreh Tahiri.
Në një intervistë për “Ora Neës”, Tahiri beri të ditur se Shqipëria ka një problem real me kanabisin, por lufta e policisë kundër kultivimit të tij, është në rrugën e duhur. Ndër të tjera ai u ndal edhe tek denoncimet e opozitës, të cilat i cilësoi si të pavërteta dhe në disa raste ndihmojnë kultivuesit për t’i shpëtuar policisë. Ai pohoi se po shkatërrohet më shumë kanabis, sepse është rritur niveli i bashkëpunimit me partnerët ndërkombëtarë.

/DRONI.al/