Produksioni i spektaklit “Dance with me” 3 ka zbuluar çiftet e konkurrentëve VIP që do të jenë në garë me njëri-tjetrin këtë vit të spektaklit, që nis transmetimin më 12 shtator në “Tv Klan”.
Mes dysheve të personazheve nga fusha të ndryshme të artit, kulturës, politikës dhe biznesit, ende pa filluar shou, është komentuar më shumë në media kombinimi i Greta Koçit me Nard Ndokën. Si e priti këngëtarja dhe nënkryetarja e Forumit Rinor të PDsë faktin që do të jetë partnerja e Nard Ndokës, kryetarit të Partisë Demokristiane të Shqipërisë, aktualisht deputet i Kuvendit?
“Kemi nisur provat me Nardin, dhe jemi shumë Ok si çift. Ishte një vendim i produksionit, por pa diskutim shumë interesant”, shprehet ajo. “Besoj që dyshja me Nardin ngjall interes edhe për faktin se të dy jemi pjesë e politikës dhe besoj se interesi është i madh edhe për vetë personazhin dhe karakterin e secilit nga ne”.
Ajo flet edhe për faktin se si e sheh këtë afrim te muzika dhe bota e spektaklit pas katër vitesh punë në politikë pranë FRPD. “Angazhimi që pata në politikë sigurisht më ka frenuar që unë të jem në dinamikën e zakonshme në muzikë, siç ishte mësuar publiku të më shihte. Kjo është dhe arsyeja pse të gjithë e komentojnë si një rikthim të fuqishëm timin në muzikë.
“Jam totalisht e fokusuar në muzikë me projekte, të cilat kanë rezultuar të suksesshme duke pasur parasysh faktin që aktualisht kam një axhendë të ngjeshur koncertesh.“ Ndërsa sa i takon një spektakli të tillë, ku do të jetë çdo javë në ekran, kësaj here si kërcimtare, Greta përgjigjet: “Do ta shijoj në maksimum këtë eksperiencë kaq të bukur, duke dhënë më të mirën nga vetja”. Greta dhe Nardi do të jenë një nga çiftet në garë, me ambicien për fitoren e madhe.
Ky sezon i “Dance with me” 3 do të sjellë sërish në ekran të tjerë personazhe të përfolur nga fusha të ndryshme. Dyshja Vera Grabocka e Alketa Vejsiu këtë herë kanë bërë çift personazhe të njohur publikë, shumë prej të cilëve të lakuar në media, jo vetëm për karrierën, por edhe për jetën private. Mes kombinimeve interesante janë këngëtarja, modelja e kërcimtarja braziliane Jessy Hennessy me Dj Vicky.
Shefi i kuzhinës Renato Mekolli, që do të kërcejë me këngëtaren & aktoren Laura Nezha, Miss Albania 2010 Arnita Beqiraj me aktorin Besmir Bitraku, këngëtarja Fjolla Morina me aktorin e humorit Xum Allushi dhe prezantuesja Bora Zemani me këngëtarin Alban Ramosaj./Panorama Plus
