Skandal me tenderat e pastrimit në Tiranë e Kavajë

Me kërkesë të Prokurorisë së Tiranës, gjykata ka nxjerrë një urdhër-ndalimi për shtetasin italian Antonio Abrusci, me detyre administrator i firmes “Ecologica SHPK”.

Kjo firmë ka rritur të fitojë tenderin për pastrimin e zonës lindore të kryeqytetit dhe pastrimin e qytetit të Kavajës për vitin 2016, me anë të dokumeteve të falsifikuar.

Tv Klan ka mundur të mësojë për këtë rast, fillimisht është bërë një kallëzim nga Ministria e Transporteve pas dyshimeve se mjetet e kësaj kompanie nuk ishin ato që thuhej në dokumentet e tenderit dhe nuk kishin kryer kontrollin teknik, i cili është një detyrim ligjor.

Sipas dosjes së dorëzuar në Prokurori janë të paktën 12 mjete të rënda që përdoren për pastrim, që u është falsifikuar viti i prodhimit dhe kontrolli teknik dhe për më tepër u mungon edhe siguriacioni.

Mësohet se të dhënat për mjetet e punës, firma i ka dorëzuar në mënyrë elektronike pranë Bashkisë së Tiranës për pastrimin e zonës lindore, një tender që kap shifrën e 1 miliard e 200 milionë lekëve të vjetra.

Hetimet e Prokurorisë zbuluan se dyshimet e Ministrisë së Transporteve ishin të sakta.

Një tjetër kompani pjesëmarrësë në garë kishte paraqitur ankesë pranë komisionit të prokurimeve publike dhe për pasojë fondi i tenderit për pastrimin e zonës lindore të Tiranës nuk i është lëvruar kompanisë italiane, edhe pse ligjërisht ajo është shpallur fituese.

Mësohet se Komisioni i Prokurorimit Publik i ka kërkuar Drejtorisë së Transportit Rrugor në Tiranë informacione për mjetet e kompanisë Ecologica.

Hetimet e Prokurorisë kanë zbuluar se italiani Antonio Abrusci, me të njëjtin mekanizëm dhe më të njëjtat dokumente të falsifikuara ka fituar edhe tenderin e pastrimit për Kavajën.

Urdhër-ndalimi për italianin është lëshuar në fund të muajit Korrik. Televizioni Klan mësoi se ai është larguar nga Shqipëria pak para lëshimit të urdhërit dhe nuk është kthyer më.

Tv Klan

/DRONI.al/