Dy të rinj nga Prishtina Eron Agaj dhe Arianit Gashi janë qëlluar disa herë me armë zjarri derisa me skuterët e tyre po bënin xhiro në afërsi të parkut të madh të kryeqytetit.
21 vjeçari Agaj ndërroi jetë me të mbërritur në Qendrën Klinike Universitare të Kosovës, ndërsa shoku i tij Gashi vazhdoi luftën për jetë në sallën e operacionit në qendrën emergjente, deri pasdite. Rreth orës 16:30 u njoftua edhe vdekja e tij, përkunder përpjekjeve të mjekëve.
“Gazeta Express” ka mësuar nga burime policore se i dyshuari që vrau Eron Agajn dhe Arianit Gashin është shtetas i Republikës së Shqipërisë dhe ndodhet në kërkim policor. Policia e Kosovës ka njoftuar se vrasja te Parku i Qytetit në Prishtinë, ka ndodhur si pasojë e gjuajtjes me armë zjarri. Këtë e ka bërë të ditur zëdhënësja e policisë për rajonin Prishtinës, Flora Ahmeti. Burime policore i kanë thënë Express-it se viktimat kanë pasur disa precedentë në Policinë e Kosovës.
10 persona janë vrarë ditët e fundit në Kosovë pas një serie atentatesh në disa qytete, pjesa më e madhe e të cilave janë të rinj.
