Kryetari i Kuvendit Ilir Meta ka zbuluar një detaj mjaft interesant nga ditët e tensionuara brenda mazhorancës. Në studion e ABCNews përballë gazetares Mirela Milori, Meta tha se në një nga këto ditë i kishte thënë kryeministrit Rama se nëse është problem kush do të ketë qeverinë ai mund t’i jepte disa vota dhe të mbetej kryeministër.
“I kam thënë Ramës, t’i jap 2-3 vota dhe mund të bësh 71 për të mbajtur qeverinë. Njëlloj siç i kam thënë edhe para një viti që nëse nuk i pëlqen koalicioni me LSI-në mund të bënte koalicion me PD-në nëse dëshironte dhe LSI mund të rrinte në opozitë”, tha Meta.
Meta i referohet krizës së koalicionit gjatë skandalit të aferës CEZ kur deklaroi në një dalje publike se “shumë shpejt mund të dëgjoni një koalicion Rama – Basha dhe një opozitë Meta-Meta”.
Kryetari i Kuvendit Ilir Meta ka treguar gjithashtu edhe një fakt interesant nga negociatat për miratimin e reformës në drejtësi. Ai thotë se dy ditë përpara votimit ka marrë në telefon ish-kryeministrin Berisha pasi kishte dëgjuar që reformën e mbante të bllokuar Berisha.
“Kam fol me Berishën në telefon dy ditë para miratimit të reformës. Madje nuk kisha as numrin e tij. Jo se e kisha fshirë, por kam pasur një problem me telefonin. Numrin e Berishës ma dha deputeti Bylykbashki. Kisha dëgjuar një ide se mos e pengonte Berisha. Ai kërkonte të drejtën e tyre, të drejtën e opozitës dhe çdo gjë u sqarua”, tha Meta.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
