Kishte vendosur të kalonte pushimet në Shqipëri! Kishte sfiduar rreziqet e paralajmëruara dhe skepticizmin që e shoqëron këtë destinacion; kishte vendosur t’i kalonte ato pak ditë duke notuar në ujërat e mrekullueshme të jugut të Shqipërisë; midis detit turkuaz dhe maleve të larta që prodhojnë një pamje mahnitëse. Ai do të kishte qenë me siguri një fans i madh i Shqipërisë dhe i bukurive tona, sikur ky vend që zgjodhi me aq besim të mos kthehej ne varrin e tij.
Kështu mund të përshkruhet pak a shumë historia tragjike e kësaj mesdite në Himarë, kur Denis Kaiumov, një shtetas rus, nga Shën Petërsburgu, që po notonte ne det, u masakrua nga një motor uji ose gomone. Nga ato që vërtiten kërcënuese, çdo ditë, çdo orë, në ujërat e mrekullueshëm të Jugut. Që thyejnë çdo rregull, çdo ligj, çdo masë sigurie dhe që në shumicën e rasteve, drejtohen nga djemtë dhe vajzat e përkëdhelura të njerëzve të fuqishëm të këtij vendi. Atyre që njihen si të paprekshëm dhe që besojnë se ligji nuk ekziston dhe nuk ka vlerë për ta. Turisti i huaj që notonte në det, është goditur dhe lënë aty, pa ndihmën e parë, pa e transportuar në spital, ndërsa motoristi vrasës është larguar pa lënë gjurmë, duke kryer kështu një krim të dyfishtë. Goditjen e notarit dhe braktisjen e tij në gjendje të rëndë, pra fshehjen e krimit. Nëse ai do kishte ndaluar ta çonte në spital, i ndjeri mund të ishte ende gjallë sot.
Historia ishte tronditëse dhe befasuese për shumë vetë, por jo për mua. Si një notar i distancave të largëta në ujërat e bregut, në 3 vitet e fundit më shumë shpenzoj kohë për t’u ruajtur nga motorët e tërbuar se sa notoj në destinacionin tim. Që prej 30 vitesh notoj gjithnjë në të njëjtën distancë, thuajse 50 metra nga bregu, paralel me të, dhe jam bërë jo rrallë dëshmitar i tmerrit që notarët apo familjarët provojnë nga performanca e çmendur e adoleshentëve mbi motorë uji. Ecin me 50 milje në orë, 12 – 15 metra nga bregu, për t’i lënë më shumë mbresë vajzave që janë aty, apo që shokët e tjerë ti filmojnë për snapchat. Futen midis zonave të rrethuara të plazheve private duke bërë rrotullime spektakolare, sikur janë pilotë të garave ekstreme dhe jo pushues si gjithë të tjerët. Janë bërë një kërcënim konstant, në shkelje konstante të ligjit. Si në gjithë botën edhe në Shqipëri, vendnisja e tyre duhet të jetë e mirëpërcaktuar, duhet të ketë një platformë dhe një instruktor. Motorët duhet të dalin në det me maksimumi 5 milje në orë dhe vetëm kur te jenë 1 km nga bregu mund të ecin lirshëm. Në Shqipëri ligji është bërë 150 metra nga bregu dhe nuk respektohet thuajse kurrë. Zonat e limituara nuk ekzistojnë sepse bashkitë nuk kanë bërë asgjë për këtë. Ndaj mund të shohësh në opinion.al dhe në facebook me dhjetëra video kur adoleshentë dhe fëmijë që nuk kanë mbushur ende moshën, bëjnë pirueta midis kokave të pushuesve që lahen. Në perëndim nëse shkel ligjin drejtuesi gjobitet, ndërsa pronarit i konfiskohet mjeti. Në Shqipëri nuk ka asnjë rast të tillë. Sot mësova se në gjithë rastet e konfiskimeve nga policia, motorët janë kthyer mbrapsht nga Prokuroria ose Gjykata. Dhe ata vijojnë xhiron e tyre të çmendur, që mbi të gjitha, në Shqipëri kushton më shtrenjtë edhe se në BE, 90 mijë lekë të vjetra për 30 minuta.
Në 2 vitet e fundit personalisht kam shkëmbyer kushedi sa telefonata me Ministrin e Brendshëm apo drejtues policie për këtë problem. I fundit një javë më parë. I tmerruar nga parada makabre që këta motorë bëjnë ndërsa ti je në det, krejt i pambrojtur, edhe pse zakonisht unë notoj me një mjet identifikues. Në të gjitha rastet që mjetet janë bllokuar, më insistim personal, kanë rezultuar ose pronë e ndonjë vrasësi me pagesë, ose ndonjë djali deputeti, ose biznesmeni, që ja përplaste në fytyrë policit sigurinë e tij: fol me babin tim, s’ke punë me mua.
Në dy vitet e fundit ka pasur së paku 5 viktima nga ky fenomen, pa llogaritur tmerrin e pushuesve në plazh dhe merakun e prindërve për fëmijët. Po askush nuk është shqetësuar deri tani. Pushteti lokal i pari. Ai që duhej ti pajiste me licencë, por që në vend të licencës së lundrimit, ju ka dhënë licencën e vrasësve. Dhe vrasja ka ndodhur sot, duke kthyer mbrapsht me arkivol, një të huaj, që deshi të pushonte në Shqipëri, duke besuar se ky vend e meritonte vëmendjen dhe dashurinë e tij. Por që nuk është çudi, që ky det të kthehet në varr edhe për shumë të tjerë, sepse ky shtet, nuk ka fuqi ose nuk do, të ndalojë ca shkelës të përkëdhelur ligji, që të japin spektakël kriminal përpara qytetarëve të pambrojtur të tij.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
