Rrogozhinë, arrestohet vrasësi I bashkëkombësit, operacioni plastik e fshehu për 9 vjet nga drejtësia italiane

Foto Ilustruese

Një personi shpallur në kërkim ndërkombëtar, është arrestuar sot në Rrogozhinë.
Burimet e policisë Vendore bënë të ditur se Specialistët e Komisariatit Rrogozhinë, bënë të mundur kapjen e shtetasit në kërkim, Florenc Shamo, 31 vjeç, banues në Rrogozhinë.
Arrestimi i tij u bë sepse, Interforc/Italia ka dërguar shkresën e datës 03. 06. 2016, ku është lëshuar urdhri i ekzekutimit nga Prokuroria e Republikës pranë Gjykatës së Firences, i dënuar me 14 vjet burg, për veprën penale “Vrasje në bashkëpunim”, parashikuar nga Kodi Penal Italian.
Pritet ekstradimi i këtij shtetasi në drejtim të shtetit Italian.
Florenc Shamo, 31vjeçari i arrestuar sot në Rrogozhinë për llogari të drejtësisë italiane, ka një betejë të gjatë kundër ekstradimit në vendin fqinj.
Sipas gazetës italiane Corrriere në një artikull të datës 20 janar të vitit 2009, shqiptari Shamo akuzohet për një vrasje të kryer më 6 gusht të vitit 2007, ku ka humbur jetën Elvis Daci, 27-vjeç, me origjinë shqiptare. Krimi u krye në Firence. Në nëntor të po atij viti, policia italiane lëshoi një urdhër arresti ndërkombëtar për Florenc Shamon.
Shqiptari Shamo sipas artikullit, ka udhëtuar në vende të ndryshme të Evropës, si në Greqi, Holandë, Spanjë dhe në Shqipëri.
Por, më 4 janar të vitit 2009, ai ishte nisur me një anije mallrash në drejtim të Torontos në Kanada, nëpërmjet një karte identiteti të falsifikuar italiane, duke u quajtur Geracitano Vincenzo, lindur në Siderno në krahinë e Reggio Calabria. Sipas gazetës italiane, shqiptari kishte kryer edhe një operacion për ndryshimin e fytyrës.
Më 16 janar të atij viti, shërbimet e emigracionit në Kanada e arrestuan atë në portin Halifax dhe gjatë asaj kohe do të nisnin procedurat e ekstradimit drejt Shqipërisë.

/DRONI.al/