Ambasadori i SHBA-ve, Donald Lu, dhe ambasadorja e BE-së në Tiranë do të marrin pjesë ditën e hënë në mbledhjen e grupeve parlamentare të tri partive për Reformën në Drejtësi.
Sipas axhendës së rakorduar me drejtuesit e këtyre grupeve, ambasadorët do ta nisin turin e takimeve me deputetët e Kuvendit në orën 13:00 me mbledhjen e Grupit Parlamentar socialist, që si zakonisht mblidhet në selinë e Partisë Socialiste.
Pas kësaj mbledhjeje, në orën 15:00 ata do të shkojnë në selinë e Partisë Demokratike, ku do të marrin pjesë në mbledhjen e deputetëve demokratë, e cila pritet të zgjasë për shkak të qëndrimeve jo të vendosura të tyre për draftin, edhe pse në parim janë shprehur se do ta votojnë Reformën në Drejtësi.
Pasi të kenë përfunduar me demokratët, dy ambasadorët që po udhëheqin lobimin politik për Reformën në Drejtësi do të marrin pjesë në mbledhjen e Grupit Parlamentar të LSI-së në orën 17:00.
Kjo është hera e parë që ambasadorë të huaj marrin pjesë në mbledhjet e grupeve parlamentare, ndërsa ekspertët e OPDAT-it dhe EURALIU-s kanë përgatitur draftin përfundimtar për Reformën në Drejtësi pas opinionin përfundimtar të Komisionit të Venecias.
Fillimisht, ambasadorët kërkuan takim me grupet parlamentare ditën e premte, por për shkak të angazhimeve të deputetëve në zonat e tyre elektorale, takimet u shtynë për në fillim të javës së ardhshme. Vetë Ambasada Amerikane në Tiranë e konfirmoi këtë përmes një deklarate.
“Ambasadorët Lu dhe Vlahutin kanë rënë dakord me 3 grupet parlamentare që të takohen me secilin prej grupeve, në radhë, sipas numrit të deputetëve, PS, PD, LSI. Po punojmë për t’i organizuar takimet javën e ardhshme”, thuhej në njoftimin.
“Panorama”
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
