Kongresi i partisë komuniste në Korenë e Veriut vazhdon punimet sot për të dytën ditë dhe pritet që t’i shtojë një titull të ri, më prestigjoz, udhëheqësit Kim Jong Un.
Agjencia Qendrore e Lajmeve e kontrolluar nga shteti në Korenë e Veriut njoftoi sot se zoti Kim do të zgjidhet në një post të ri, që e bën atë të një autoriteti të barabartë me babain dhe gjyshin e vet, të cilët kishin titullin e Sekretarit të Përgjithshëm të Partisë së Punëtorëve, thotë Zëri i Amerikës.
Për momentin Kim Jong Un është sekretar i parë i partisë. Ndryshimi, megjithëse simbolik, është një sinjal i qartë për botën se udhëheqësi i ri synon ta konsolidojë më tej pushtetin në duart e tij.
Një grup që ndjek zhvillimet në Korenë e Veriut thotë se së shpejti Pheniani mund të kryejë një tjetër provë bërthamore. Zyrtarët koreano-jugorë janë në gjendje gatishmërie për një provë të mundshme që mund të jetë planifikuar për t’u realizuar gjatë kongresit, një grumbullim masiv që nuk është realizuar prej 36 vjetësh.
