DETAJE/ Ja si ndodhi manipulimi i të dhënave të aksidentit nga 3 oficerët e policisë së Delvinës

Foto Ilustruese

Prokuroria e Sarandës ka dhënë disa hollësi e detaje hetimore, në vijim të informacionit shpërndarë nga ana e Policisë së Shtetit, lidhur me ndalimin e 3 oficerëve të Policisë Rrugore, Delvinë.
Mësohet se me urdhër të Prokurorisë së Sarandës, janë ndaluar 3 oficerë të Policisë Rrugore të Delvinës, të dyshuar për veprat penale të “Shpërdorimit të detyrës” dhe “Falsifikimit të dokumenteve”, pasi ka fshehur dhe manipuluar të dhënat për një aksident, ndodhur mesditën e datës 2 maj në këtë zonë.
Urdhrat e ndalimit të Prokurorisë së Sarandës janë zbatuar nga ana e Shërbimit për Çështje të Brendshme të Ministrisë së Brendshme dhe oficerët e ndaluar janë:
1. Artan Alinani, me detyrë Shef i Sektorit të Qarkullimit Rrugor në Komisariatin e Policisë Delvinë;
2. Osman Tozo, efektiv i Sektorit të Qarkullimit Rrugor në Komisariatin e Policisë Delvinë;
3. Shkëlqim Vrapi, efektiv i Sektorit të Qarkullimit Rrugor në Komisariatin e Policisë Delvinë;
Nga veprimet hetimore të deritanishme të Prokurorisë së Sarandës, rezulton se…:
Më datë 02.05.2016, rreth orës 13.00, në një nga rrugët e qytetit të Delvinës, automjeti i markës “Mercedes Benz”, me targe “DL xxxx A”, në pronësi të shtetasit M. A., por që drejtohej nga shtetasi A. Sh., është karamboluar me automjetin me targa greke “YZX xxxx”, të drejtuar nga shtetasi J. K., banues në Delvinë, rezident në shtetin grek.
Në Sallën Operative të Komisariatit të Policisë Delvinë, njoftimi për këtë ngjarje është dhënë në orën 14.30, nga telefonata e një qytetari.
Të orientuara nga Salla Operative, në vendin e ngjarjes kanë mbërritur efektivët e Sektorit të Qarkullimit Rrugor në Komisariatin e Policisë Delvinë, Shkëlqim Vrapi dhe Osman Tozo. Këta të fundit, pasi kanë marrë dijeni për rrethanat e ngjarjes së ndodhur, kanë identifikuar automjetet e përfshira në të, si edhe drejtuesit e tyre. Paralelisht, ata kanë raportuar pranë Sallës Operative të Komisariatit të Policisë Delvinë, ku oficeri i rojës ka dokumentuar në dokumentin “regjistër i marrjes së kërkesave, ankesave të qytetareve në Zyrën e Informacionit të Komisariatit të Policisë Delvinë” të dhënat e raportuara nga vendngjarja. Në vijim, këta efektivë kanë kryer shoqërimin për në Komisariatin e Policisë Delvinë të automjetit me targë “DL xxxx A”, si edhe drejtuesit të tij, shtetasin A. Sh.
Po ashtu, në vendngjarje, pak çaste më pas, ka mbërritur efektivi i Komisariatit të Policisë së Rendit, B. M., i cili në deklarimet e tij shpjegon “…Ndërkohë, erdhën dy punonjësit e policisë së patrullës së qarkullimit rrugor, Osman Tozaj dhe Shkëlqim Vrapi. Ata … i janë drejtuar personit tjetër, por ai përgjigjej ndryshe herë pas here … punonjësi Shkëlqim Vrapi i kërkoi t’i bënte testin e alkoolit dhe shkoi te makina e policisë për të marrë qesen e gypin dhe pashë që ia vuri në gojë … këtë person e kanë shoqëruar në Komisariat”.
Pavarësisht ngjarjes së ndodhur, nga ana e tij, Shefi i Sektorit të Qarkullimit Rrugor në Komisariatin e Policisë Delvinë, Artan Alinani, ka mundur të ndërrojë emrin e drejtuesit të vërtetë të automjetit me targë “DL xxxx A” të përfshirë në ngjarje, shtetasin A. Sh., dhe në vend të tij, në praktikën e aksidentit të ndodhur ka dokumentuar shtetasin R. J. Në realizimin e këtij dokumentacioni janë marrë edhe efektivët Shkëlqim Vrapi dhe Osman Tozo.
Madje, ka qenë vetë Shefi i Sektorit të Qarkullimit Rrugor në Komisariatin e Policisë Delvinë, Artan Alinani, i cili është paraqitur pranë Sallës Operative të Komisariatit të Policisë Delvinë, ku ka verifikuar emrin e drejtuesit te automjetit me targë “DL xxxx A” të evidentuar në dokumentin “regjistër i marrjes së kërkesave, ankesave të qytetarëve në Zyrën e Informacionit të Komisariatit të Policisë Delvinë”, duke i kërkuar oficerit të rojës të bëjë ndryshimin përkatës. Oficeri i Sallës Operative, duke besuar te Oficeri Artan Alinani, ka realizuar edhe korrigjimin e të dhënave në regjistër, duke shënuar emrin e shtetasit R. J., pas fshirjes me korrektor emrin e shtetasit A. SH., veprim për të cilin Oficeri i Sallës Operative shpjegon “Shefi i qarkullimit … më thotë që ke shënuar gabim drejtuesin e mjetit tip ‘Benz’ …, duke më thënë se nuk ishte ai drejtues mjeti, por një person tjetër. Ai më dha emrin e personit tjetër”.
Këto veprime, të kryera nga Shefi i Sektorit të Qarkullimit Rrugor në Komisariatin e Policisë Delvinë, Artan Alinani, kanë marrë shtysë nga fakti se drejtuesi real në çastin e ndodhjes së aksidentit i automjetit me targë “DL xxxx A”, pikërisht shtetasi A. Sh. nuk disponon Leje Drejtimi për Automjete, rrethanë kjo e vërtetuar edhe nga shkresa e Drejtorisë Rajonale të Shërbimit të Transportit Rrugor Sarandë.

Për më shumë mund të lexoni edhe …

Delvinë, arrestohet shefi qarkullimit dhe dy vartësit, falsifikuan dokumentet për një aksident
/web/Delvine_arrestohet_shefi_qarkullimit_dhe_dy_vartesit_falsifikuan_dokumentet_per_nje_aksident_18471_1.php

/DRONI.al/