GRAFIKËT/ “ERE konfirmon abuzimet e qeverisë me energjinë”

“Raporti i ERE është rikujtesa për çdo shqiptar që sot paguan një faturë më të hidhur për energjinë”.
Këshu u shpreh sot, deputetja e PD-së, Jorida Tabaku.
Sipas ERE, çmimi i energjisë elektrike për konsumatorët u rrit me rreth 13 për qind gjatë 2015. Ky raport thekson se të gjithë tarifat e energjisë u rritën për të gjitha kategoritë e konsumatorëve.
Akoma më tej, më shumë se gjysma e konsumatorëve të energjisë elektrike që harxhojnë më pak se sa 300 kv pra 56 % e familjeve shqiptare kanë paguar mesatarisht 6 % më shumë se sa në vitin 2014. Një familje e varfër, që jeton me më pak se 5 USD në muaj ka paguar falë të ashtuquajturës reformë mesatarisht 9.52 lek për kilovat në 2015 ndërsa në 2014 ajo paguante mesatarisht 8.89 lek për kilovat.
“Raporti ERE, nxjerr edhe njëherë në pah gënjeshtrën qeveritare se çmimi mesatar do të ulej për të gjithë konsumatorët. Duke faktuar edhe një herë se sot të gjithë konsumatorët, biznese apo familje, paguajnë 11.22 lekë/kilovat nga 9.22 që paguanin më parë”,vijoi Tabaku.
Ndërkohë që qeveria raporton se ka ulur deficitin e OSHEE përmes kërbaçit ndaj qytetarëve më të varfër dhe të pambrojtur të vendit, raporti ERE thotë të kundërtën sipas Tabakut.
“Është e vërtetë që OSHEE ka arritur të mbledhë 12.25 mld lekë detyrime të prapambetura nga ana e qytetarëve nga viti 2007-2014, por nuk duhet harruar që borxhi që kjo kompani ka krijuar nga administrimi rilindas është pak më i lartë,  13.29 mld lekë vetëm në një vit. Shifrat janë kokëforta, shqiptarët sot paguajnë një çmim më të lartë energjie ndërsa OSHEE ka rritur detyrimet që konsumatorët kanë ndaj saj. Reforma energjetike ka fatin e çdo reforme tjetër të nisur nga kjo qeveri, gënjeshtër, propagandë dhe asnjë rezultat. OSHEE nga ana tjetër mbetet institucioni që promovon dhe krijon tendera nga më korruptivët duke rënduar shqiptarët me fatura që vetëm për vitin e shkuar kanë qenë mbi 91 mijë të tilla. Vetëm në 3 muajt e parë të vitit kjo kompani ka tenderuar 23 mld lekë pa asnjë eficensë, e vetëm për dy vite në shpenzime luksi janë harxhuar 21 mln usd. Ndërkohë që, qytetarët në të gjithë Shqipërinë sot janë duke protestuar për rritjen e çmimit të energjisë për mbifaturimet, OSHE vazhdon abuzimet, ndarjen e parave të gjakut të shqiptarëve. Kjo është oligarkia e korrupsionit që sundon sot, me abuzime e plaçkitje në çdo degë të qeverisë, ku nga më të dalluarat në këtë drejtim mbetet OSHEE dhe sektori i energjisë”, u shpreh më tej deputetja demokrate.

/DRONI.al/