Policia e EULEX-it, në bashkëpunim me Policinë e Kosovës kanë realizuar aksionin më të madh kundër krimit të organizuar, ku dyshohet se janë të përfshirë 51 persona, ndërsa listën e kryeson ish-komandanti i UÇK-së, Azem Syla, që aktualisht është deputet i Partisë Demokratike të Kosovës.
Në momentin e bastisjes së shtëpisë së tij, në fshatin Kishnarekë të Drenasit, deputeti Syla nuk ndodhej aty, ndërsa mësohet se atij i është lënë fletëparaqitjeje për në polici.
Deputeti Syla dhe 50 të dyshuarit e tjerë, përfshirë ish-kryetarin e Gjykatës Komunale të Prishtinës Nuhi Uka, avokatë dhe persona të tjerë, dyshohet se kanë tjetërsuar dhjetëra hektarë tokë nga pronësia shoqërore në pronësi private të tyre.
Gjatë aksionit, policia ka qëndruar për disa orë në zyrat e ish-kryegjyqtarit Nuhi Uka, nga ku kanë marrë materiale, ndërsa mësohet se policia ka zbuluar se një natë më parë, nga zyrat e Ukës janë larguar shumë prova, për të cilat policia ka marrë në pyetje edhe një roje si dëshmitar.
Zëdhënësja e EULEX-it, Besa Domi e ka konfirmuar përmes telefonit për Top Channel aksionin, si dhe ka treguar se janë arrestuar 6 persona, por pa dhënë më shumë detaje.
Për aksionin e EULEX-it dhe të policisë kosovare ka reaguar edhe Presidenti Hashim Thaçi, i cili përmes Facebook-ut ka thënë se, lufta kundër korrupsionit dhe krimit të organizuar është çelësi i ndërtimit të shtetit demokratik e të drejtë.
Personat e arrestuar këtë të mërkurë dyshohen se, pas përfundimit të luftës në Kosovë, kanë shpronësuar dhjetëra hektarë tokë që ishin pjesë e ndërmarrjes shoqërore “KBI Kosova Export”, duke i kaluar në pronësi të disa serbëve të Kosovës, e pastaj me vendime të paligjshme gjyqësore i kanë kaluar në pronësi të tyre.
Kosovë, aksion i madh polici-EULEX kundër krimit të organizuar
