Niveli i lartë i kredive me probleme dhe përqendrimi i huas së keqe te bizneset e mëdha, ka bërë që bankat e nivelit të dytë të paralajmërojnë shtrëngim të standardeve të kredidhënies në të ardhmen për sipërmarrjet e mëdha.
Kjo masë sipas tyre do të nisë të zbatohet që në tremujorin e dytë të këtij viti. Një ditë me parë ekspertë të Bankës së Shqipërisë thanë se përqendrimin më të madh kreditë me problem e ka në dy kompanitë në vend ARMO dhe KURUM.
Qëndrimi strikt i bankave në dhënien e kredisë për bizneset e mëdha në të ardhmen, njoftohet në raportin e Bankës së Shqipërisë për Aktivitetin Kreditues, në tremujorin e parë të vitit. Në këtë periudhë bankat në përgjithësi kanë lehtësuar standardet e kreditimit si për individët ashtu edhe për bizneset. Por, këtyre lehtësirave i janë përgjigjur pozitivisht me rritje të kërkesës për kredi, vetëm bizneset e vogla dhe të mesme, ndërsa kërkesa e bizneseve të e mëdha dhe e individëve ka shënuar rënie.
Rënia e besimit të konsumatorëve në ekonomi është një nga shkaqet kryesore, që ka ndikuar në rënien e kërkesës për kredi nga qytetarët.
Banka Qendrore thotë së gjatë tremujorit të parë 2016 , pritshmëritë ishin pozitive për marrje kredie nga ana e konsumatorëve si për banesa edhe për konsum, por ky rezultat shënoi të kundërtën.
Faktor tjetër që ka ndikuar në rënien e kredisë konsumatore ka qenë edhe situata në tregun e pasurive të paluajtshme, pasi deri në fund të 2015 në bilancet e bankave numërohen afro 22 miliardë lekë prona të pa shitura. /tvklan.al/
Bankat “rrudhin dorën”, shtrëngojnë kreditë për bizneset
