SKANDALI/ Debat mes Idrizit e Bushatit: Diplomati shqiptar merr pjese në konferencën e Vorioepirit

Çështje çame u bë objekt diskutimi mes kreut të PDIU-së Shpëtim Idrizi dhe ministri i Jashtëm Ditmir Bushati. Idrizi tha se në një konferencë shkencore të zhvilluar nga Ministria Greke e Jashtme, është përdorur termi Vorio Epiri, term që ai e quan irredentist, dhe precedent të rrezikshëm.

Gjithashtu gjatë fjalës nga foltorja e Kuvendit Idrizi i ka kërkuar llogari Bushatit për diplomatin e lartë shqiptar, i cili ishte i pranishëm në konferencën e fundit bërë nga Ministria e Jashtme e Greqisë e ku u përmend termi Vorioepir.

“Ky është skandal, ish ambasadori në Britani ngriti zërin për të mbrojtur të drejtën historike për shqiptarët, po ky diplomati ca bënte aty, apo e ndjen veten në ndërthurje që duhet t’i shërbejë interesit të një shteti tjetër e jo shtetit që përfaqëson”- tha Idrizi, duke theksuar se u fol për irredentizëm shqiptar, qëndrimin kundër historik grek për cështjen came dhe Vorioepir.

“Vorio Eipiri nuk është territor. Termi irredentist është papranueshëm dhe vijon ta përdorë Ministria e Jashtme. Ky është precedent i rrezikshëm që cënon tërësinë. Po ministria jonë e Jashtme kur e ka në plan të shkruajë një letër të qartë apo konferenca shkencore? Greqia merr guximin dhe shkon në sulm dhe na flet ditën për diell për irredentizimin.Ju ftoj haptazi të përdorim pa droje termin Çamëri”, tha Idrizi.

Idrizi akuzoi shtetin shqiptar se nuk është në lartësinë e duhur për problematikat e hapura me Greqinë. “Shteti grek e di cështjen came që ekziston dhe kërkon zgjidhje, por po merr masat të ketë argumentet ligjore e historike kundër saj, fqinjët janë seriozë në shovinizmin e tyre, shteti shqiptar nuk është në lartësinë e duhur, nuk ka dosje të plotë e serioze me argumente historikë përballë Greqisë. Camëria është territor gjeografik dhe shtrihet në dy shtet me shumicë shqiptare dikur, kurse Voriopepiri shpikje greke, term irredentist i papranueshëm”- tha ai.

/DRONI.al/