Është rrëzuar nga komisioni dekreti i Presidentit për pronat. Komisioni parlamentar i Ligjeve e ka rrëzuar dekretin e Presidentit Nishani, i cili ktheu për rishqyrtim në Kuvend ligjin “Për trajtimin e pronës dhe përfundimin e procesit të kompensimit të pronave”.
Përfaqësues të Presidencës deklaruan në komision se nuk mund të kthehemi pas me ligjin e pronave, pasi prek parime themelore, siç është siguria juridike.
Ndërsa zv/ministri i Drejtësisë, Idlir Peçi tha se ligji nuk e cënon sigurinë juridike, por i jep fund situatës së krijuar me pronat në Shqipëri, në këto 25 vjet. Gjithashtu, komisioni i Ligjeve pritet të shqyrtojë sot dhe nismën e deputetes demokrate Jozefina Topalli, e cila kërkon të zgjasë afatin e ligjit aktual ‘të kthimit dhe kompensimit të pronave’.
Në dekretin e publikuar më 29 dhjetor, Presidenti parashtron argumentet kundërshtuese ndaj ligjit të ri të pronave, duke theksuar se skema e ofruar përmes tij në zgjidhjen e problemit sistemik dhe të përsëritur të mosekzekutimit të vendimeve për kompensimin e pronarëve, që kanë një vendim administrativ apo gjyqësor, bie ndesh me parimin kushtetues të sigurisë juridike dhe nuk është aspak efektive, siç kërkohet nga Gjykata Europiane e te Drejtave të Njeriut(GJEDNJ).
Ligji “Për trajtimin e pronës dhe përfundimin e procesit të kompensimit të pronave’, i miratuar më 17 dhjetor në Kuvend, sipas qeverise, e vendos çështjen e pronave në shinat reale të zgjidhjes, ndërsa përmes zbatimit të tij merr përparësi kompensimi fizik.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
