I arrestuari Ilir Memushaj
Dy të mbijetuarit në atentatin e së premtes në Mbrostar të Fierit, ndodhen në spitalin e qytetit.
Nën mbikëqyrjen e policisë Klement Kastrati me tre plumba dhe Elton Margariti me dy, po marrin mjekim për plagët.
Ata nuk kanë rrëfyer asgjë lidhur me një motiv të mundshëm për ngjarjen, ku mbeti i vrarë shoku i tyre Granit Kasa.
Ndalimi i vlonjatit Ilir Memushaj si i dyshuar për sulmin me kallashnikov po ashtu ka rezultuar me mohim.
Burime nga prokuroria thanë se Memushaj nuk i është përgjigjur aasnjë pyetjeje të hetuesve përveçse ka thënë se nuk ka lidhje me ngjarjen dhe me viktimën. Ky i fundit sipas prokurorisë ishte i përfshirë në trafikun e drogës në Hollandë. Importimi i aktivitetit të paligjshëm sic e quajnë hetuesit kthimin e tij në Shqipëri përpara disa kohësh mund të jetë bërë shkak që konkurentët e tregut të drogës ta eliminojnë.
Makina e djegur e viktimave
Por policia e Fierit ka variantin e saj te ngjarjes. Ajo dyshon fort se viktima nuk ishte shënjestra, por kunati i tij Klement Kastrati. Emri i këtij të fundit është lakuar për disa ngjarje të ndodhura vitet e fundit në Fier, por ne asnje rast nuk është provuar fajësia.
Hetuesit janë të rezervuar në lidhje me tre bashkëpunëtorët në sulm por marrja e “Toyota”-s blu me qera nga njeri prej tyre është konfirmuar.
Makina ishte marrë me qera në Tiranë një ditë përpara ngjarjes dhe u gjet e djegur një km larg vendit të krimit. Gëzhojat në vendngjarje gjithsej 15 po ekzaminohen në laboratorin e balistikës për të parë nëse janë të një arme të vetme apo mund të ketë pasur shkëmbim zjarri. Gjithashtu edhe arma kallashnikov po i nënshtrohet ekzaminimit për të parë nëse është arma e krimit apo e ndonjërit prej të lënduarve, pavarësisht se për hetueset nuk ka pasur kohë të mjaftueshme që viktima dhe dy miqtë e tij të kundërpërgjigjeshin edhe nëse do të kishin armë me vete.
