Qytetarët e Vlorës, do të paguajnë më shumë taksa dhe tarifa, gjatë vitit 2016.
Kështu ka vendosur Këshilli i Bashkisë Vlorë, në mbledhjen e fundit për vitin 2015, të zhvilluar sot.
Kanë qenë 21 vota “pro” dhe 14 “kundër” rritjes së taksave.
Sipas miratimit të pasqyrës së re të taksave sot këshill, vlonjatët do të paguajnë më shumë taksa, për pasuritë e paluajtshme.
Për herë të parë vlonjatët, do të paguajnë taksë mbi truallin, e cila do të përfshijë edhe bizneset.
Rritje ka pësuar edhe taksa e fjetjes në hotel, duke i dhënë një goditje sektorit të turizmit në Vlorë, duke iu shtuar problematikave që ka ky sektor, në Vlorë.
Këshilli i Bashkisë ka miratuar rritje takse dhe për sa i përket taksës së ndikimit në infrastrukturë, ndërkohë që sektori i ndërtimit vazhdon të jetë në krizë të plotë, për shkak të inflacionit të ndërtimeve, por edhe për shkak të bllokimit të lejeve për të ndërtuar.
Taksa e tabelës dhe reklamës ka ekzistuar për 4 kategori, por nga Bashkia është paraqitur për miratim një total prej 7 taksash.
Në tarifat, për zënien e hapësirave publike, janë shtuar 2 kategori të reja taksash dhe konkretisht:
1. taksa e zënies së hapësirave publike për qëllime biznesi.
2. për zënien e hapësirave publike në plazh.
Tarifa e shërbimit të ndriçimit dhe gjelbërimit, ka pësuar një rritje nga 1500 lekë në 1800 lekë, në qytetin e Vlorës dhe Orikumit ndërsa për sa u përket njësive të reja administrative që i janë bashkuar Bashkisë së Vlorës, ato janë edhe më të mëdha, siç është rasti i Komunës Qendër, në të cilën kjo tarifë ka qenë 300 lekë ne vit dhe që sot banorët e këtyre zonave do te detyrohen te paguajnë vlerën 1200 lekë ose 4-fishin e asaj që paguanin.
CILAT DHE SA RRITEN/ Këshilltarët PS e LSI “dhuratë” vlonjatëve më shumë taksa për vitin 2016
