Të paktën 25 familje priten të preken nga reformat e sektorëve të ndryshëm në administratën publike dhe uljen e numrit që e përfitojnë ndihmën ekonomike, shkruan rilindja demokratike.
Për shkak të reformës së re territoriale pritet që rreth 6200 punonjës në të gjithë vendit të mbeten pa punë.
Parashikohet që vetëm në arsim të shkurtohen rreth 7 mijë mësues. Referuar të dhënave të qeverisë, në buxhetin e arsimit do të ketë reduktime drastike të fondit të pagave e po ashtu dhe vendeve të punës. Nga 38 mijë punonjës që ka aktualisht në sistemin parauniveristar, në vitin 2016 është llogaritur fondi i pagave vetëm për 31 mijë punonjës. Reforma në arsim do të prekë edhe edukatoret e kopshteve dhe punonjësit e mirëmbajtjes së shkollave, të cilët do të kalojnë në varësi të pushtetit vendor.
Vala e shkarkimeve do të prekë gjithashtu sistemin e shëndetësisë.
Janë 24 spitale e qendra shëndetësore në vend, në të cilat shumë prej punonjësve do të lënë vendin e punës. Lajmi është konfirmuar nga vet ministri i Shëndetësisë, Ilir Beqja, i cili ka deklaruar në Komisionin e Çështjeve Sociale se, shkurtimet do të prekin spitalet e të gjithë vendit. Por megjithëse parashikimi i largimeve nga puna është bërë në buxhetin 2016, heqja e punonjësve nga shërbimet spitalore ka nisur prej një muaji e gjysmë. E ndërsa ministri deklaroi se në total do të shkurtohen 338 punonjës, punonjësit e spitaleve demaskojnë mashtrimin e ministrit.
Në të vërtetë, vetëm përsa i përket mjekëve parashikohet që të shkarkohen rreth 600 prej tyre, në një kohë që shifra të tjera zënë shkurtimet e infermierëve si dhe punonjësve të tjerë të stafeve spitalore. Ministria parashikon që në çdo spital apo qendër shëndetësore të shkurtojë rreth 40% të stafit, duke nxjerrë kështu një numër të konsiderueshëm punonjësish pa punë.
Vetëm nga shkarkimet e nisura këtë periudhë në disa spitale të vendit, në Tepelenë u hoqën nga puna rreth 60 punonjës, kur në total ishin 170. 35 punonjës janë shkarkuar në Spitalin e Lushnjës, ndërkohë shkarkimet kanë vijuar edhe në Burrel ku janë nxjerrë në rrugë rreth 41 punonjës. Në spitalet dhe qendrat e tjera shëndetësore në të gjithë vendin kanë mbërritur, ndërkohë shkresat me emrat e punonjësve që do të hiqen nga puna.
