Ilir Meta ia ka dalë të lëshojë një porosi për Edi Ramën sot në intervistën e nxehtë që dha në studiot e Zërit të Amerikës në Uashington.
Lidhur me vlerësimin e tij për qeverinë, Ilir Meta tha se impulset që ai ka kërkuar nuk kanë të bëjnë me emrat por me domosdoshmërinë për të shtuar energjitë për rezultate më të prekshme. Sfidat janë shumë të mëdha dhe jo vetëm të Shqipërisë por edhe të rajonit e Europës.
Në lidhje me situatën ekonomike Ilir Meta i pyetur se cfarë note do ti vinte qeverisë, tha se nuk është mësues që të vërë nota. Jam pjesë e koalicionit dhe i gatshëm të njoh përgjegjësitë e mia. Qeveria e mori vendin në situatë të vështirë. Ajo nuk është përgjegjëse për krizën greke , krizën në eurozonë dhe partnerët tanë kryesorë si Italia. Shumë më tepër duhet të bëhet në këtë drejtim. Pa vendosur asnjë notë duhet të bëjmë shumë më tepër për rritjen ekonomike të vendit dhe të mësojmë edhe nga fqinjët si Maqedonia që kane arritur të tërheqin investime te huaja edhe pse nuk i kane mundësitë tona. Qeveria duhet ta ketë në vëmendje këtë gjë. Të arrijmë ta cojmë ekonominë tonë në potencialet e saj të zhvillimit”, tha kryetari i Kuvendit.
Kryetari i Kuvendit Ilir Meta ka sqaruar axhendën e tij gjatë një interviste të vështirë në Zërin e Amerikës. Duke biseduar me gazetaren Meta konfirmoi konstatimin e droni.al për një axhendë të kufizuar të Kryetarit të Kuvendit në SHBA.
“ Axhenda është e përqëndruar kryesisht tek Kongresi por kemi edhe takime të tjera, megjithatë është e përqëndruar tek Kongresi”, tha Ilir Meta vetëm pak minuta pas publikimit të droni.al rreth axhendës nën nivelin e zyrtarit të lartë që z. Meta zhvilloi në SHBA.
